பதிவு செய்த நாள்
04 பிப்2019
00:23
கடன் பெற வேண்டிய சூழலில், கிரெடிட் கார்டு கடன், தனிநபர் கடன்களை விட செலவு குறைந்த முதலீடுகள் மீதான கடன் வசதியை பரிசீலிக்கலாம்
வங்கிகளும், நிதி நிறுவனங்களும் கடன் வழங்கும் வேகம் அதிகரித்து இருக்கிறது. பல வங்கிகள் உடனடி கடன் வசதியையும் அளிக்கின்றன. முன் அனுமதி பெற்ற கடன்களும் வழங்கப்படுகின்றன. இவைத் தவிர கிரெடிட் கார்டு மீது கடன் பெறுவதும் எளிதாகி இருக்கிறது.
ஆனால், கடன் பெறும் வசதி அதிகம் இருப்பதனால் மட்டும், விரும்பிய போதெல்லாம் கடன் வாங்குவது சரியல்ல. பொதுவாக இந்த வகை கடன்கள் ஈடு செய்யப்படாதவை என்பதால் இவற்றின் மீதான வட்டி விகிதமும் அதிகம் என்பதை நினைவில் கொள்ள வேண்டும்.வீட்டுக்கடன், சொத்துகள் மீது கடன் பெறுவது போன்றவை ஈடு செய்யப்பட்ட கடனாகும். இவற்றுக்கான வட்டி விகிதம் குறைவு. இதே போல, முதலீடுகள் மீதும் கடன் பெறும் வசதி இருக்கிறது.
கடன் அளவு
இவை லோன் எகைன்ஸ்ட் செக்யூரீட்டிஸ் என குறிப்பிடப்படுகின்றன. காப்பீடு பாலிசிகள், மியூச்சுவல் பண்ட்கள், நேரடி பங்குகள், நிரந்தர வருமான திட்டங்கள், ஈ.டி.எப்.,கள், சேமிப்பு பத்திரங்கள் ஆகிய முதலீடுகள் மீது கடன் பெற வங்கிகள் அனுமதிக்கின்றன. இத்தகைய முதலீடுகள் உங்கள் வசம் இருந்தால், இவற்றின் மீது கடன் பெற முடியும்.
முதலீடுகள் மீது கடனாக வழங்கும் தொகை வங்கிக்கு வங்கி மாறுபடலாம். இந்த கடன் ஓவர் டிராப்ட் வசதியாக வழங்கப்படுகிறது. முதலீட்டு சான்றிதழை அடமானம் வைத்து கடன் பெறுவதாக இதை புரிந்து கொள்ளலாம். ஒரு சில வங்கிகள் ஆன்லைனில் கடன் பெறவும் அனுமதிக்கின்றன.
சமபங்குகள் மீது கடன் பெற
வேண்டும் எனில் டிமெட் வடிவிலான கணக்கு வைத்திருக்க வேண்டும். கடனாக வழங்கப்படும் தொகை முதலீட்டின் அளவுக்கு ஏற்ப அமையும். மியூச்சுவல் பண்ட் திட்டம் எனில், என்.ஏ.வி எனப்படும் அதன் நிகர சொத்து மதிப்புக்கு ஏற்ப கடன் வழங்கப்படுகிறது.
பெரும்பாலான வங்கிகள் இந்த வகை கடன் வசதியை அளிக்கின்றன. இவற்றுக்கான வட்டி விகிதம், முதலீட்டின் தன்மை மற்றும் வங்கிக்கு ஏற்ப அமையும். ஸ்டேட் வங்கி, மியூச்சுவல் பண்ட், பங்குகள் ஆகியவற்றின் மீதான கடனுக்கு, 10.95 சதவீத வட்டி வசூலிக்கிறது.
தங்க சேமிப்பு பத்திரங்கள் மீதான கடனுக்கான வட்டி விகிதம், 10.45 சதவீதமாகும். வட்டி விகிதம் தவிர, ஆண்டு பராமரிப்பு கட்டணம், கிரெடிட் பீரோ கட்டணம், முத்திரைத்தாள் கட்டணம் போன்றவையும் பொருந்தும்.
எப்போது பெறலாம்
பொதுவாக முதலில் சேமித்து, அதன் பிறகே செலவு செய்ய வேண்டும். சேமிக்கும் தொகையை சரியாக முதலீடு செய்ய வேண்டும். முதலீடுகள் மீது கடன் பெறும் வசதி இருந்தாலும் அதை நாடுவதில் கவனம் தேவை. கடன் பெறுவது தவிர்க்க இயலாது எனும் சூழலில் இந்த வாய்ப்பை பரிசீலிக்கலாம். ஏனெனில், கிரெடிட் கார்டு கடனுக்கான வட்டி விகிதம், 22 முதல், 44 சதவீதம் வரை அமையலாம். தனிநபர் கடனுக்கான வட்டி விகிதம், 12 முதல், 22 சதவீதமாக அமையலாம்.
மாறாக, முதலீடு கடன், 10 முதல் 14 சதவீத வட்டி கொண்டிருக்கலாம். மற்ற கடனை விட செலவு குறைந்ததாக இருந்தாலும், இவற்றை திரும்பிச் செலுத்த முறையான திட்டமிடல் தேவை. அப்போது தான் கடனை முடித்து, முதலீட்டின் பலனை தொடர்ந்து பெற முடியும்.
மேலும் வங்கி மற்றும் நிதி செய்திகள்
|
Advertisement
|
Advertisement
|
Advertisement
|
|
|
|