புதுடில்லி:கடந்த மார்ச்சில், தொழில் துறை உற்பத்தி, 0.1 சதவீதம் பின்னடைவை கண்டுள்ளது.

கடந்த ஆண்டு இதே மாதத்தில் இத்துறையின் உற்பத்தி வளர்ச்சி, 5.3 சதவீதமாக இருந்தது.தயாரிப்பு துறை உற்பத்தி குறைந்ததால், 21 மாதங்களில் இல்லாத அளவிற்கு, தொழில் துறை உற்பத்தி வளர்ச்சி சரிவடைந்துள்ளது.இதற்கு முன், 2017, ஜூன் மாதம், இத்துறை, 0.3 சதவீதம் பின்னடைவை கண்டிருந்தது.

கடந்த, 2018 -- 19ம் நிதியாண்டில், தொழில் துறை உற்பத்தி வளர்ச்சி, மூன்று ஆண்டுகளில் இல்லாத அளவிற்கு, 3.6 சதவீதமாக சரிவடைந்துள்ளது. முந்தைய, 2017 -- 18ம் நிதியாண்டில், இத்துறை, 4.4 சதவீத வளர்ச்சியை கண்டிருந்தது.கடந்த, 2016 -- 17 மற்றும் 2015 -- 16ம் நிதியாண்டுகளில், தொழில் துறை உற்பத்தி வளர்ச்சி, முறையே, 4.6 சதவீதம் மற்றும் 3.3 சதவீதமாக இருந்தது.மதிப்பீட்டு மாதத்தில், தயாரிப்பு துறை உற்பத்தி, 0.4 சதவீதமாக பின்னடைவை கண்டிருந்தது. இது, கடந்த ஆண்டு, மார்ச்சில், 5.7 சதவீத வளர்ச்சி கண்டிருந்தது.

இதே காலத்தில், பொறியியல் சாதனங்கள் பிரிவின் உற்பத்தி, 3.1 சதவீதத்தில் இருந்து, 8.7 சதவீதமாக பின்னடைவை கண்டுள்ளது.மின் துறை உற்பத்தி, 5.9 சதவீதத்தில் இருந்து, 2.2 சதவீதமாக உயர்ந்துள்ளது. சுரங்கத் துறையின் உற்பத்தி வளர்ச்சி, 3.1 சதவீதத்தில் இருந்து, 0.8 சதவீதமாக குறைந்துள்ளது.மதிப்பீட்டு மாதத்தில், அடிப்படை பொருட்கள் மற்றும் கட்டுமானப் பொருட்கள் துறை, முறையே, 2.5 சதவீதம் மற்றும் 6.4 சதவீதம் வளர்ச்சி கண்டுள்ளது.

நுகர்வோர் சாராத சாதனங்கள் துறையின் உற்பத்தி, 0.3 சதவீதம் வளர்ச்சி பெற்றுள்ளது. தொழில் துறை உற்பத்தியை கணக்கிட உதவும், 23 துறைகளில், 11 துறைகள் வளர்ச்சி கண்டுள்ளன.இதனிடையே, பிப்ரவரி மாத தொழில் துறை உற்பத்தி வளர்ச்சி, மறுமதிப்பீட்டில், 0.1 சதவீதத்தில் இருந்து, 0.07 சதவீதமாக குறைக்கப்பட்டுள்ளதாக, மத்திய புள்ளியியல் அலுவலகம் தெரிவித்துள்ளது.