பதிவு செய்த நாள்
27 மே2019
06:54
பல வகையான, ‘கிரெடிட் கார்டு’கள் இருப்பதால், உங்களுக்கு ஏற்ற கார்டை தேர்வு செய்து விண்ணப்பிப்பது அவசியமாகும்.
கிரெடிட் கார்டை பொருத்தவரை அதன் தன்மை உணர்ந்து கவனமாக கையாண்டால், அதிக பலன் பெறலாம். அதற்கேற்ப சந்தையில் பல வகையான கிரெடிட் கார்டுகளும் இருக்கின்றன. கேஷ்பேக் சலுகை, பரிசுப்புள்ளிகள் உள்ளிட்ட பல சலுகைகளை கிரெடிட் கார்டுகள் வழங்குகின்றன. ஒன்றுக்கும் மேற்பட்ட கிரெடிட் கார்டை பயன்படுத்துபவர்களும் இருக்கின்றனர். இவற்றை எல்லாம் உணர்ந்து, நீங்களும் கிரெடிட் கார்டு பெற தீர்மானித்து முயற்சிக்கும் போது, உங்கள் விண்ணப்பம் நிராகரிக்கப்பட்டால் ஏமாற்றமாக இருக்கும். இதை, தனிப்பட்ட நிராகரிப்பாக எடுத்துக்கொள்ள வேண்டாம்.
கிரெடிட் கார்டு விண்ணப்பம் நிராகரிக்கப்படுவதற்கான பொதுவாக காரணங்களை பார்க்கலாம். பல வகையான கிரெடிட் கார்டுகள் இருந்தாலும், அவை ஒவ்வொன்றும் அவற்றுக்கான குறைந்தபட்ச வருமான தேவையை கொண்டிருக்கும். விண்ணப்பம் ஏற்கப்பட இதற்கு பொருத்தமானவராக இருப்பது அவசியம். எனவே, கிரெடிட் கார்டுக்கு விண்ணப்பிக்கும் முன், குறிப்பிட்ட வகை கார்டுக்கான வருமானம், வயது ஆகிய அம்சங்களை அறிந்து விண்ணப்பிக்கவும்.
உங்களுக்கு ஏற்ற கார்டை தேர்வு செய்து விண்ணப்பித்தால், நிராகரிக்கப்படுவதற்கான வாய்ப்புகள் குறைவு. எனவே, சரியான கார்டுக்கு விண்ணப்பிப்பது முக்கியம். கிரெடிட் கார்டு தேவைக்கான எல்லா தகுதிகளும் இருந்து, உங்கள், ‘கிரெடிட் ஸ்கோர்’ குறைவாக இருந்தாலும் விண்ணப்பம் ஏற்கப்படாமல் போகலாம். கிரெடிட் ஸ்கோர் எனப்படும் கடன் தகுதி புள்ளிகள் அதிகமாக இருந்தால், கிரெடிட் கார்டுக்கு விண்ணப்பிக்கும் போது உங்களுக்கு சாதகமாக இருக்கும். கார்டு பெறுவதற்கு மட்டும் அல்லாமல், மற்ற அம்சங்களிலும் சாதகமான வாய்ப்புகளை பெறலாம். ஆகவே, கிரெடிட் ஸ்கோர் குறைவாக இருந்தால், அதை சரி செய்வதற்கான நடவடிக்கைகளை மேற்கொள்ள வேண்டும்.
கார்டு விண்ணப்பத்தை பூர்த்தி செய்வதிலும் கவனமாக இருக்க வேண்டும். விண்ணப்பத்தில் தகவல்களை சரியாக பூர்த்தி செய்யவில்லை என்றாலும் நிராகரிக்கப்படலாம். கேட்கப்பட்டிருக்கும் அனைத்து தகவல்களையும் சரியாக அளிப்பதோடு, முகவரி, ஊதிய சான்றிதழ், சேமிப்பு கணக்கு அறிக்கை போன்ற தேவையான ஆவணங்களையும் சரியாக சமர்ப்பிப்பது முக்கியம். இவை எல்லாம் சரியாக இருந்தால் கூட, விண்ணப்பம் நிராகரிக்கப்பட்டால், உங்கள் பகுதியில் குறிப்பிட்ட கார்டுக்கான சேவை அளிக்கப்படாதது காரணமாக இருக்கலாம்.
கிரெடிட் கார்டு பெறும் ஊக்கத்தில், ஒரு விண்ணப்பம் நிராகரிக்கப்பட்டவுடன், இன்னொரு கார்டுக்கு விண்ணப்பிக்க கூடாது. கிரெடிட் ஸ்கோர் குறைவாக இருப்பதால் ஒரு வங்கி நிராகரித்தது என்றால், அடுத்த வங்கியும் அதே காரணத்திற்காக நிராகரிக்கலாம். இந்த நிராகரிப்பு, கிரெடிட் ஸ்கோரை மேலும் பாதிக்கும் என்பதை மனதில் கொள்ள வேண்டும். நிராகரிப்புக்கான காரணத்தை கண்டறிந்து, அதை சரி செய்த பிறகே புதிதாக விண்ணப்பிக்க வேண்டும்.
இந்த அம்சங்களை எல்லாம் மனதில் கொண்டு, உங்களுக்கு பொருத்தமான கிரெடிட் கார்டை தேர்வு செய்வது நல்லது. பல வகையான கார்டுகளையும், அவை தரும் பலன்களையும் ஒப்பிட்டு, உங்களுக்கு அதிக பலன் அளிக்கும் அம்சங்கள் கொண்ட கார்டை தேர்வு செய்ய வேண்டும். பரிசுப்புள்ளிகள், கேஷ்பேக் போன்ற குறிப்பிட்ட பலன்களை பெறுவதற்கான நிபந்தனைகள், கார்டு பயன்பாட்டிற்கான ஆண்டு கட்டணம் போன்ற அம்சங்களையும் அறிந்து கொள்ள வேண்டும். மேலும், கிரெடிட் கார்டு பயன்பாட்டிற்கான மாத பட்ஜெட்டை தீர்மானித்து, அதன்படி செயல்பட வேண்டும். கார்டு பயன்பாட்டால் கடன் சுமை ஏற்படாமல் இருக்க, இந்த கட்டுப்பாடு உதவும்.
மேலும் வங்கி மற்றும் நிதி செய்திகள்
|
Advertisement
|
Advertisement
|
Advertisement
|
|
|
|