பதிவு செய்த நாள்
15 ஜூலை2019
00:01
தேசிய பங்குச் சந்தை குறியீட்டு எண், நிப்டி, கடந்த ஜூன் மாதத்தில், வரலாற்று உச்சத்தை அடைந்தது குறிப்பிடத்தக்கது. ஜூன் மாத உயர்வான, 12,106 புள்ளிகளில் இருந்து, தற்போது, 550 புள்ளிகள் சரிந்து, வர்த்தகமாகி வருகிறது.
மார்ச் முதல் மே வரையிலான, மூன்று மாத காலங்களில், இந்திய பங்குச் சந்தைகள், குறிப்பிடத்தக்க அளவு உயர்ந்திருந்தன. அதாவது, நடந்து முடிந்த லோக்சபா தேர்தலுக்கு முன், விலையேற்றம் காணப்பட்ட பங்குச் சந்தைகள், தேர்தலுக்குப் பின், தற்போது சிறிய அளவிலான சரிவுடன் வர்த்தகமாகி வருகின்றன.இடைக்கால பட்ஜெட் தாக்கல் செய்யப்பட்டபோது, அதில் பங்குச் சந்தைகள் குறித்து, ஒரு சில அறிவிப்புகள் வெளியாகின. இதில், வெளிநாட்டு
முதலீட்டாளர்கள், நம் சந்தையில் முதலீடு செய்வதற்கான கொள்கைகளில் அறிவித்த மாற்றம், சந்தையை பாதித்தது.
மேலும், பட்டியலிடப்பட்ட நிறுவனங்களில், பொதுப் பங்குகளின், குறைந்தபட்ச மூலதன முதலீட்டு வரம்பு, 25 சதவீதத்திலிருந்து, 35 சதவீதமாக அதிகரிக்கப்படுவதாக, பட்ஜெட்டில் அறிவிக்கப்பட்டது. இதை, இரண்டு ஆண்டுகளுக்குள் அமல்படுத்த வேண்டும் என்றும் அறிவிக்கப்பட்டது. இதன் காரணமாகவும், பங்குச் சந்தைகள் பாதிப்பை சந்தித்தன.இத்துடன், மேலும் பல காரணங்களால், மாத தொடக்கத்திலிருந்தே பங்குச் சந்தைகள் சரிந்து வர்த்தகமாகி வருகின்றன.
இந்தியாவின் தொழில் துறை வளர்ச்சி குறியீடு, மே மாதத்தில், 3.1 சதவீதமாக சரிவை சந்தித்துள்ளது. இது, இதற்கு முந்தைய மாதத்தைக் காட்டிலும் குறைவாகும்.கடந்த நிதியாண்டின், நான்காம் காலாண்டான, ஜனவரி முதல், மார்ச் வரையிலான காலகட்டத்தில், இந்தியாவின், மொத்த உள்நாட்டு உற்பத்தி வளர்ச்சி, 5.8 சதவீதமாக இருந்ததாக, மத்திய அரசின் புள்ளி விபரம் தெரிவிக்கிறது.
இது, கடந்த ஐந்து ஆண்டுகளில் இதே காலகட்டத்தோடு ஒப்பிடும்போது, குறைவாகும். நடப்பு நிதியாண்டில், மொத்த உள்நாட்டு உற்பத்தி வளர்ச்சி, 7.1 சதவீதமாகவும், அடுத்த நிதியாண்டில், 7.2 சதவீதமாகவும் இருக்கும் என்று பொருளாதார ஆய்வறிக்கையில் தெரிவிக்கப்பட்டுள்ளது.
பணவீக்க விகிதம் மற்றும் பொருளாதார வளர்ச்சி எதிர்பார்ப்பு ஆகியவற்றை, ரிசர்வ் வங்கி குறைத்துள்ளது. முந்தைய நிதியாண்டின் நான்காம் காலாண்டில், பணவீக்க விகிதம், 2.4 சதவீதமாகவும், நடப்பு நிதியாண்டின் முதல் ஆறு மாதங்களுக்கு, 3.2 சதவீதமாகவும் இருக்கும் என்றும் தெரிவிக்கப்பட்டுள்ளது. இதற்கு முன், இது, 3.4 சதவீதமாக மதிப்பிடப்பட்டு இருந்தது குறிப்பிடத்தக்கது.இந்த வாரத்தைப் பொறுத்தவரை, நிப்டி சப்போர்ட், 11,465 மற்றும் 11,390; ரெசிஸ்டென்ஸ் 11,590 மற்றும் 11,630.
முருகேஷ் குமார்
murukesh.munar@choiceindia.com
மேலும் பங்கு வர்த்தகம் செய்திகள்
|
Advertisement
|
Advertisement
|
Advertisement
|
|
|
|