பதிவு செய்த நாள்
03 நவ2019
23:47
இந்திய பங்குச் சந்தைகள், கடந்த வாரம் உயர்ந்து வர்த்தகம் ஆகின. கடந்த இரு மாதங்களாக, அதாவது, ஆகஸ்ட் மற்றும் செப்டம்பர் மாதத்தில், தேசிய பங்குச் சந்தை குறியீட்டு எண், ‘நிப்டி’ 1,300 புள்ளிகள் உயர்ந்தது குறிப்பிடத்தக்கது.
மும்பை பங்குச் சந்தை குறியீட்டு எண், ‘சென்செக்ஸ்’ கடந்த வியாழனன்று, அதன் முந்தைய வரலாற்று உச்சத்தை அதாவது, 40,312 புள்ளிகளை கடந்து, புதிய வரலாற்று சாதனை உச்சமாக, 40,392 புள்ளிகளை எட்டியது.
நடப்பு நிதி ஆண்டின், இரண்டாம் காலாண்டுக்கான நிறுவனங்களின் நிதி நிலை அறிக்கைகள் வெளிவந்த வண்ணம் உள்ளன. இதில், குறிப்பிட்ட சில முக்கிய நிறுவனங்களில், ஆதாயம் எதிர்பார்த்ததை விட அதிகரித்தது. இது, பங்குச் சந்தை உயர்வுக்கு வழிவகுத்தது.மேலும், உலக பங்குச் சந்தையில் ஏற்பட்டுள்ள மாற்றமும் உயர்வுக்கு ஒரு காரணமாக அமைந்தது. தேசிய பங்குச் சந்தையில் உள்ள, 11 துறை சார்ந்த குறியீட்டு எண்களும் உயர்ந்து, வர்த்தகம் ஆகின. இதில், ஊடகம் மற்றும் பொதுத் துறை வங்கிகள் ஆகியவற்றின் துறை குறியீடுகள், 10 சதவீதத்துக்கு மேல் உயர்ந்தன.
கமாடிட்டி மற்றும் வாகனத் துறை குறியீட்டு எண்கள், 5 சதவீதத்துக்கு மேல் உயர்ந்தன. நிப்டி, 500 குறியீட்டு எண், 3 சதவீதம் உயர்ந்தது.டாலருக்கு நிகரான இந்திய ரூபாயின் மதிப்பு, தொடர்ந்து இரண்டாவது வாரமாக மதிப்பு உயர்ந்து வருவதும், சந்தைக்கு சாதகமான போக்குக்கு வழிவகுத்தது.நாட்டின் மிகப்பெரிய வாகன தயாரிப்பு நிறுவனமான, ‘மாருதி சுசூகி’யின் விற்பனை, அக்டோபர் மாதத்தில் அதிகரித்துள்ளது. கடந்த, ஏழு மாதங்களாக குறைந்திருந்த விற்பனை, அக்டோபரில் அதிகரித்திருப்பது, வாகனக் துறையில் மீண்டுமொரு நம்பிக்கைக்கு வழிவகுத்துள்ளது.
கடந்த வாரம் நடைபெற்ற, அமெரிக்க ரிசர்வ் வங்கி கூட்டத்தில், வட்டி விகிதம், 0.25 சதவீதம் குறைக்கப்பட்டது. இந்தியாவின் முக்கியமான, எட்டு துறைகள் சார்ந்த வளர்ச்சி, செப்டம்பர் மாதத்தில், 5.2 சதவீதம் குறைந்துள்ளது. இது கடந்த, 14 மாதங்களில் இல்லாத சரிவாகும்.
இந்த வாரத்தைப் பொறுத்தவரை, நிப்டி ரெசிஸ்டென்ஸ், 11,985 புள்ளிகள். இதை கடக்கும் நிலையில், மேலும் உயர்ந்து, வர்த்தகமாக வாய்ப்புள்ளது. அடுத்த ரெசிஸ்டென்ஸ், 12,075 மற்றும் 12,180; சப்போர்ட், 11,785 மற்றும் 11,700.
முருகேஷ் குமார்
murukesh.kumar@choiceindia.com
மேலும் பங்கு வர்த்தகம் செய்திகள்
|
Advertisement
|
Advertisement
|
Advertisement
|
|
|
|