பதிவு செய்த நாள்
22 அக்2020
21:53
புதுடில்லி:ஊரடங்கு உத்தரவுகள் காரணமாக, சரிவைக் கண்டிருந்த ஸ்மார்ட்போன்கள் விற்பனை, கடந்த செப்டம்பர் காலாண்டில் மீண்டும் அதிகரித்துள்ளது. இக்காலாண்டில், இதுவரை இல்லாத அளவுக்கு விற்பனை அதிகரித்து, 5 கோடியாக உயர்ந்து, சாதனை படைத்துள்ளது.
மொத்தம் விற்பனை ஆன போன்களில், சீன போன்களின் எண்ணிக்கை மட்டும், 76 சதவீதமாகும்.தொழில்நுட்ப சந்தை பகுப்பாய்வு நிறுவனமான,‘கேனலிஸ்’ மேற்கொண்ட ஆய்வில் இவ்வாறு தெரியவந்துள்ளது.இது குறித்து, இந்த ஆய்வறிக்கையில் மேலும் தெரிவிக்கப்பட்டுள்ளதாவது:
கடந்த ஜூலை – செப்டம்பர் காலாண்டில், நாட்டில் மொத்தம், 5 கோடி ஸ்மார்ட் போன்கள் விற்பனை செய்யப்பட்டுள்ளன.இது வரலாறு காணாத சாதனையாகும். கடந்த ஆண்டுடன் ஒப்பிடும்போது இது, 8 சதவீத வளர்ச்சியாகும். கடந்த ஆண்டு இதே காலத்தில், மொத்தம், 4.62 கோடி போன்கள் விற்பனை ஆகியிருந்தன.கடந்த செப்டம்பர் காலாண்டில் விற்பனை ஆன போன்களில், 76 சதவீதம், சீன நிறுவனங்களின் தயாரிப்புகளாகும். கடந்த ஆண்டில், இதே காலத்தில் இவற்றின் பங்களிப்பு, 74 சதவீதம் ஆகும். தற்போது, 2 சதவீதம் அதிகரித்துள்ளது.இருப்பினும், ஜூன் காலாண்டுடன் ஒப்பிடும்போது குறைவாகும். கடந்த ஜூன் காலாண்டில், சீன போன்களின் பங்களிப்பு, 80 சதவீதமாகும்.
சயோமி, சாம்சங், ரியல்மி, ஒப்போ ஆகிய நிறுவனங்களின் விற்பனை, கடந்த ஆண்டு இதே காலத்தை விட அதிகரித்துள்ளது.ஆப்பிள் நிறுவனத்தின், ஐபோன் விற்பனையும் இரட்டை இலக்க வளர்ச்சியை எட்டியுள்ளது. மதிப்பீட்டு காலாண்டில் கிட்டத்தட்ட, 8 லட்சம் போன்கள் விற்பனை ஆகியுள்ளன.இவ்வாறு ஆய்வு அறிக்கையில் தெரிவிக்கப்பட்டுள்ளது.
ஸ்மார்ட் போன் விற்பனை நிலவரம் குறித்து, கேனலிஸ் நிறுவனத்தின் ஆராய்ச்சி பகுப்பாளரான வருண் கண்ணன் கூறியதாவது:கடந்த சில மாதங்களாக, இந்தியாவிற்கும் சீனாவிற்கும் இடையில் நடந்து வரும் பதற்றம், ஒரு பரபரப்பான விஷயமாக உள்ளது. ஆனால், மக்கள் பொருட்களை வாங்கும் முடிவுகளில், இன்னும் குறிப்பிடத்தக்க தாக்கத்தை காணமுடியவில்லை.அரசாங்கம் மூன்று மாத ஊரடங்குக்கு பிறகு தளர்வுகளை அதிகரித்து, நிலையான வளர்ச்சிக்கான, சரியான சூழ்நிலையை உருவாக்கியுள்ளது.
ஏறக்குறைய அனைத்து விற்பனையாளர்களும், தயாரிப்பாளர்களும் வளர்ச்சியைக் காட்டியிருக்கின்றனர். விற்பனையில் உண்மையான வெற்றியாளர்கள், ஆன்லைன் விற்பனை நிறுவனங்கள் ஆகும்.இவ்வாறு, அவர் கூறினார்.
மேலும் சந்தையில் புதுசு செய்திகள்
|
Advertisement
|
Advertisement
|
Advertisement
|
|
|
|