பதிவு செய்த நாள்
09 ஜன2017
01:27
வளமான வாழ்க்கைக்கு திட்டமிடல் அவசியம். இதுவரை திட்டமிடலில் கவனம் செலுத்தாவிட்டால், புத்தாண்டை அதற்கான வாய்ப்பாக பயன்படுத்திக் கொள்ளலாம். புத்தாண்டின் துவக்கத்தில் இந்த ஆண்டுக்கான இலக்குகள் மற்றும் நிதி செயல்பாடுகளை தீர்மானித்து திட்டமிட நிதி காலண்டர் முறையை பின்பற்றலாம். அதாவது, மாதத்தோறும் மேற்கொள்ள வேண்டிய நிதி செயல்களை தீர்மானித்துக் கொள்வது:
முதல் காலாண்டு
ஜனவரி: ஆண்டுக்கான நிதி இலக்குகளை தீர்மானிக்கவும். உத்தேசித்துள்ள முதலீடுகள், நிலையான செலவுகள் மற்றும் பெரிய செலவுகளை பட்டியலிடவும். காப்பீடு பிரீமியம்களுக்கான நினைவூட்டலை குறித்து வைக்கவும். பில்களை செலுத்துவதற்கான தேதிகளை குறித்து வைக்கவும். பிப்ரவரி: பட்ஜெட் மாற்றங்கள் மற்றும் சலுகைகளை கவனித்து, அதற்கேற்ப திட்டமிடவும். பணியிடத்தில் திரும்பி கோரக்கூடிய தொகைக்காக மறக்காமல் விண்ணப்பிக்கவும். மார்ச்: பிள்ளைகள் பள்ளி கட்டணத்திற்கான தொகை, கையில் இருப்பதை உறுதி செய்யவும். வரிச்சலுகைக்கான திட்டமிடலில் வீண் பதற்றம் வேண்டாம்.
2ம் காலாண்டு
ஏப்ரல்: வரிச்சலுகை சார்ந்த முதலீடுகளை மேற்கொள்ள நிதி இலக்குகள் மற்றும் ரிஸ்க் தன்மையை பரிசீலிக்க வேண்டும். முதலீட்டிற்கான தொகை சம்பளத்தில் இருந்து செல்லும் வகையில் இ.சி.எஸ்., கொடுக்கவும். மே மாதம், விடுமுறை பயணம் செல்ல விரும்பினால் அதற்காக திட்டமிடவும்.மே: போனஸ் அல்லது ஊதிய உயர்வு கிடைத்தால், செலவு செய்வதற்கு முன் கடனை அடையுங்கள் அல்லது முதலீடு செய்யுங்கள்.ஜூன்: காப்பீட்டு திட்டங்கள், முதலீடுகள், சேமிப்பு கணக்கு தொடர்பான காகித பணிகளை ஆய்வு செய்து, புதுப்பிக்க வேண்டிய விஷயங்களில் கவனம் செலுத்தவும்.
3ம் காலாண்டு
ஜூலை: 2016 – 17ம் ஆண்டுக்கான வருமான வரி கணக்கை தாக்கல் செய்வதற்கான கடைசி தேதி, ஜூலை 31. கடைசி நேர நெரிசலை தவிர்க்க, முதல் அல்லது இரண்டு வாரத்திலேயே கணக்கை தாக்கல் செய்யவும். இல்லை எனில் ஆன்லைன் மூலமே கணக்கை தாக்கல் செய்யலாம். இதற்கான இணையதளங்களும் உள்ளன.ஆகஸ்ட்: சுதந்திர தின விடுமுறையை பயன்படுத்திக் கொண்டு, உங்கள் மனதை ரிலாக்ஸ் செய்து கொள்ளவும். செப்டம்பர்: இது பண்டிகை காலத்தின் துவக்கம். அதற்கேற்ப திட்டமிடவும். வாங்க வேண்டிய பொருட்களையும் பட்டியலிட்டு அதற்கேற்ப பட்ஜெட் போடவும்.
4ம் காலாண்டு
அக்டோபர்: உங்கள் வீட்டை, பழுது பார்க்க அல்லது வர்ணம் பூச திட்டமிட்டிருந்தால், இது சரியான தருணம். விழாக்கால சலுகைகளை பயன்படுத்திக் கொள்ளலாம். தீபாவளி பண்டிகையை முன்னிட்டு, ஆடைகள் வாங்க வேண்டியிருக்கும். பட்ஜெட்டை மனதில் கொள்ளவும். டிசம்பரில் விடுமுறை பயணம் செல்வதாக இருந்தால், அதற்கேற்ப திட்டமிடவும்.நவம்பர்: உங்களுக்கும், உங்கள் நிதிக்கும் ஓய்வு அளிக்க வேண்டிய மாதமாக வைத்துக் கொள்ளுங்கள்; குறைவாக செலவு செய்யுங்கள். டிசம்பர்: வருடாந்திர ஆய்வை மேற்கொண்டு உங்கள் நிதி செயல்பாடுகளை பரிசீலனை செய்யுங்கள். நிதி இலக்குகளை அடைந்திருக்கிறோமா என கேட்டுக் கொள்ளவும்.
மேலும் வங்கி மற்றும் நிதி செய்திகள்
|
Advertisement
|
Advertisement
|
Advertisement
|
|
|
|