பதிவு செய்த நாள்
26 ஜூன்2017
07:15
கச்சா எண்ணெய்
சர்வதேச சந்தையில், கச்சா எண்ணெய் விலை, கடந்த சில வாரங்களாக தொடர் சரிவை சந்தித்து வருகிறது. ஒரு பேரல், 52 டாலராக இருந்தது. தற்போது, 20 சதவீதம் விலை குறைந்து, 42.14 டாலராக கடந்த வெள்ளியன்று வியாபாரம் முடிவுற்றது. இத்தொடர் சரிவு கடந்த, 2016ம் ஆண்டுக்கு பின் தற்போது நடந்துள்ளது.
கடந்த வாரம் குறிப்பிட்டது போல, 42 டாலர் ஒரு பேரல் என்ற விலை நல்ல சப்போர்ட் ஆகும். இந்த வாரம் சந்தையில், கச்சா எண்ணெய் விலை, 42 டாலருக்கு கீழே குறையுமெனில் இச்சரிவு தொடர்ந்து, அடுத்த சப்போர்ட் ஆன, 39.25 டாலர் என்ற நிலையை அடையும் என்பதில் மாற்றமில்லை. ஒபெக் கூட்டமைப்பு நாடுகள், அதன் தினசரி உற்பத்தியை குறைத்து, கச்சா எண்ணெய் விலையை உயர்த்த கடந்த மாதம் நடைபெற்ற கூட்டத்தில் தீர்மானம் நிறைவேற்றப்பட்டது. ஆனால், நடைமுறையில் சில நாடுகள் தங்களின் உற்பத்தியை குறைக்க முன்வரவில்லை. உறுப்பு நாடான, லிபியா தன் உற்பத்தியை பன்மடங்கு அதிகரித்தது. அதாவது, கடந்த நான்கு ஆண்டுகளை விட உற்பத்தி மற்றும் சேமிப்பை உயர்த்தியது.
இது சந்தையில் கச்சா எண்ணெய் விலைக்கு பாதகமாக அமைந்தது. மற்றுமொரு நாடான, நைஜீரியாவிலும் உற்பத்தி அதிகரித்துள்ளது. மேலும், அமெரிக்க உற்பத்தியும் தொடர்ந்து அதிகரித்து வருகிறது. கடந்த புதன்கிழமை வெளி வந்த புள்ளி விவரப்படி, தினசரி கச்சா எண்ணெய் உற்பத்தி, 20,000 பேரல்கள் அதிகரித்து, 9.31 மில்லியன் பேரல்களானது. இருப்பினும், அமெரிக்க எண்ணெய் இருப்பு அளவு, 2.45 மில்லியன் பேரல்கள் குறைந்து, 509.1 மில்லியன் பேரல்களாக உள்ளது. ஒபெக் கூட்டமைப்பில் இல்லாத நாடான ரஷ்யா, அதிகளவிலான உற்பத்தி குறைப்புக்கு பலமுறை எதிர்ப்பு தெரிவித்து வருவது குறிப்பிடத்தக்கது.
பொருள் வணிக முன்பேர சந்தையின் அளவுகள்சந்தை எஸ் 1 எஸ் 2 ஆர் 1 ஆர் 2 எம்.சி.எக்ஸ்., (ரூபாய்) (ஜூலை) 2,750 2,685 2,815 2,852என்.ஒய்.எம்.இ.எக்ஸ். (டாலர்) 42.00 39.25 44.70 46.50
தங்கம், வெள்ளி
தங்கம் மற்றும் வெள்ளி விலைகள் கடந்த வாரம் சிறிது ஏற்றத்தில் முடிவடைந்தது. முந்தைய இரு வாரங்கள் விலை கடுமையாக குறைந்தது. அமெரிக்காவின் வட்டி விகிதம் 0.25 சதவீதம் உயர்த்தப்பட்டதன் காரணமாக, தங்கத்தின் மீதான முதலீட்டு ஆர்வம் குறைந்தது மற்றும் வியாபாரிகள் லாபம் எடுத்தல் போன்றவைகளால் விலை குறைந்தது. பின்னர், தொடர் கச்சா எண்ணெய் விலை சரிவாலும், மேலை நாடுகளின் பணவீக்க விகிதம் குறையும் என்ற எதிர்பார்ப்பாலும், அடுத்து நடைபெற உள்ள அமெரிக்க நிதி கொள்கையில் மாற்றம் வரும் என்ற கணிப்பாலும் தங்கம் மற்றும் வெள்ளி விலை சிறிதளவு உயர்ந்தது.
தற்போது, 10 ஆண்டு அமெரிக்க கருவூல பத்திரத்தின் வருமானம் குறைந்து, 2.15 சதவீதம் ஆக உள்ளது. இது கடந்த ஆண்டு நவம்பர் மாதத்தை விட குறைவாகும். இதனால் வரும் காலங்களில் தங்கத்தின் மீதான ஆர்வம் கூடும் என்று எதிர்பார்க்கப்படுகிறது. ஆபரண சந்தையில் சீனாவும், இந்தியாவும் பெரும் பங்கு வகிக்கின்றன. தற்போதைய புதிய வரிவிதிப்பு முறையான ஜி.எஸ்.டி., நம் உள்நாட்டில் தங்கம் மற்றும் வெள்ளி வர்த்தகத்தை எளிமையாக்குவதோடு இல்லாமல், இறக்குமதியையும் அதிகரிக்கும் என்ற எதிர்பார்ப்பு நிலவுகிறது.
வாரம் ஒரு முறை, வியாழன் அன்று வெளிவரும் அமெரிக்க பொருளாதார காரணிகளான வேலையில்லாதவர்களுக்கான ஊக்கத் தொகை விபரத்தில் எண்ணிக்கை அதிகரித்ததன் விளைவாக, அமெரிக்க நாணய குறியீட்டு எண் டாலர் இண்டெக்ஸ் குறைந்தது. இதன் காரணமாக, தங்கம் மற்றும் வெள்ளி விலை உயர்ந்து காணப்பட்டது.
தங்கம்
பொருள் வணிக முன்பேர சந்தையின் அளவுகள்சந்தை எஸ் 1 எஸ் 2 ஆர் 1 ஆர் 2 எம்.சி.எக்ஸ்., (ரூபாய்) (ஆகஸ்ட்) 28,510 28,350 28,950 29,290காம்எக்ஸ் (டாலர்) 1,250 1,238 1,267 1,280
வெள்ளி
பொருள் வணிக முன்பேர சந்தையின் அளவுகள்சந்தை எஸ் 1 எஸ் 2 ஆர் 1 ஆர் 2 எம்.சி.எக்ஸ்., (ரூபாய்) (ஜூலை) 38,050 37,600 38,800 39,160காம்எக்ஸ் (டாலர்) 16.15 15.70 17.05 17.50
செம்பு
செம்பு விலை கடந்த வாரம் அதிகரித்து, வியாபாரம் உயர்வில் முடிவடைந்தது. உலகளவில் செம்பு உபயோகம் அதிகம் உள்ள நாடுகளான அமெரிக்கா மற்றும் சீன சந்தைகளில் அதன் தேவை அதிகரிக்கும் என்ற எதிர்பார்ப்பில் விலை உயர்ந்தது.
அண்மையில் வெளிவந்த புள்ளி விபரப்படி, சீனாவின் செம்பு உபயோகம், 2017ம் ஆண்டு, 7,20,000 டன்களாக இருக்கும் என்று கணிக்கப்பட்டுள்ளது. மேலும், இந்தோனேசியாவை சேர்ந்த பிரிபோர்ட் என்ற சுரங்கத்தின் தொழிலாளர்கள் மேற்கொண்ட வேலை நிறுத்தம் காரணமாக உற்பத்தி பாதிப்புக்குள்ளாகியது. இது, உலகின் இரண்டாவது மிகப்பெரிய சுரங்கமாகும். வரும் நாட்களில் செம்பின் விலை அதிகரித்து, வியாபாரம் ஆகும் என எதிர்பார்க்கப்படுகிறது.
பொருள் வணிக முன்பேர சந்தையின் அளவுகள்சந்தை எஸ் 1 எஸ் 2 ஆர் 1 ஆர் 2 எம்.சி.எக்ஸ்., (ரூபாய்) (ஜூன்) 369.50 365.00 377.50 384.00
-முருகேஷ் குமார்
மேலும் பங்கு வர்த்தகம் செய்திகள்
|
Advertisement
|
Advertisement
|
Advertisement
|
|
|
|