பதிவு செய்த நாள்
14 ஆக2017
08:19
நிதி விஷயங்கள் தொடர்பாக ஆலோசனை பெறுவதும், நிதி சாதனங்கள், முதலீட்டு வாய்ப்புகள், சேமிப்பு உத்திகள் தொடர்பாக நட்பு வட்டாரத்தில் கலந்துரையாடுவதும் நல்லது தான். கடன் சுமை, சேமிப்பு சிக்கல் போன்றவை இருந்தால், நிதி விஷயங்கள் குறித்து, நம்பகமானவர்களிடம் வெளிப்படையாக பகிர்ந்து கொண்டால் தெளிவு பிறக்கும் வாய்ப்புள்ளது. அதே போல, குடும்பத்திற்கான நிதி திட்டமிடல் என வரும் போது, கணவன், மனைவி சேர்ந்து திட்டமிடுவது அவசியம். நிதி விஷயங்களில் பகிர்தல் நல்லது என்றாலும், சில முக்கியமான நிதி தகவல்களை, யாரிடமும் தெரிவிக்காமல் இருப்பது அவசியம். இப்படி காக்க வேண்டிய நிதி ரகசியங்கள் இவை:
கார்டு விபரங்கள்
கிரெடிட் கார்டு அல்லது டெபிட் கார்டில், உங்கள் பெயர் மற்றும் கார்டு செல்லுபடியாகும் காலம் உள்ளிட்ட விபரங்கள் இடம் பெற்றிருக்கும். பெயர் தவிர மற்ற தகவல்கள், மற்றவர்கள் தெரிந்து கொள்ளக்கூடாதவை. இந்த தகவல்கள், பரிவர்த்தனையில் முக்கியமானவை. இவை தான், முதற்கட்ட பாதுகாப்பு. இவை ரகசியமாக இருக்கும் வரை, முறைகேடான பயன்பாட்டிற்கு வாய்ப்பில்லை.
பாஸ்வேர்டு
இணைய வங்கிச் சேவை அல்லது கிரெடிட் கார்டு பயன்பாட்டின் போது, பாஸ்வேர்டு தேவை. கார்டின் பயன்பாடு தொடர்பான மற்ற தகவல்கள் களவாடப்படலாம் என்றாலும் கூட, பாஸ்வேர்டு என்பது உங்கள் கட்டுப்பாட்டில் இருக்க வேண்டும். அதை எப்போதும் ரகசியமாக வைத்திருங்கள். பாஸ்வேர்டை யாரிடமும் தெரிவிக்கக் கூடாது என்பதோடு, அதை காகிதத்தில் குறித்து வைப்பதையும் தவிர்க்க வேண்டும்.
ஒருமுறை பாஸ்வேர்டு
பல பரிவர்த்தனைகளை பூர்த்தி செய்ய, ஒருமுறை பாஸ்வேர்டு அனுப்பி வைக்கப்படும். இவை பரிவர்த்தனையின் பாதுகாப்பை உறுதி செய்ய உதவுகின்றன. இவையும் உங்களுக்கானது மட்டும் தான். மற்றவர்களிடம் தெரிவிக்கவோ, பகிர்ந்து கொள்ளவோ வேண்டாம். பொதுவாக வங்கிகளோ நிதி அமைப்புகளோ, பாஸ்வேர்டு அல்லது பின் எண் போன்ற விபரங்களை கேட்பதில்லை. இப்படி யாரேனும் கேட்டாலே, எச்சரிக்கையாகி விட வேண்டும்.
‘பின்’ எண்
பாஸ்வேர்டு போலவே, ‘பின்’ எண் எனப்படும் பர்ஷனல் ஐடன்டிபிகேஷன் நம்பர், பயன்பாட்டிலும் கவனம் தேவை. டெபிட் கார்டு மூலம் ஏ.டி.எம்.,மில் பணம் எடுக்க அல்லது பரிவர்த்தனையின் போது அதற்கான பின் எண்ணை பயன்படுத்துகிறோம். இது ரகசியமானது மற்றும் பாதுகாப்பு அளிப்பது. இதை மற்றவர்களிடம் தெரிவிக்க கூடாது. துண்டு சீட்டில் குறித்து வைப்பது போன்றவையும், கண்டிப்பாக தவிர்க்க வேண்டும்.
சி.வி.வி., எண்
கிரெடிட் கார்டு மற்றும் டெபிட் கார்டு பின் பக்கம் கார்டு வெரிபிகேஷன் வேல்யூ அல்லது சி.வி.வி., எண் இடம் பெற்றிருக்கும். ‘ஆன்லைன்’ மூலமான பரிவர்த்தனைகளை பூர்த்தி செய்ய இது அவசியம். கார்டில் அச்சிடப்பட்டிருக்கும் இந்த எண்ணை, எக்காரணம் கொண்டும், யாருக்கும் தெரிவிக்கவோ, யாருடனும் பகிர்ந்து கொள்ளவோ வேண்டாம்.
மேலும் வங்கி மற்றும் நிதி செய்திகள்
|
Advertisement
|
Advertisement
|
Advertisement
|
|
|
|