பதிவு செய்த நாள்
16 நவ2017
00:00
புதுடில்லி : ‘இந்திய குடும்பங்களின் வருவாய் மதிப்பு, 2022ல், 7.10 லட்சம் கோடி டாலராக உயரும்’ என, சுவிட்சர்லாந்தைச் சேர்ந்த, நிதிச் சேவை நிறுவனமான, ‘கிரெடிட் சூசி’ கணித்துள்ளது.
இது குறித்து, இந்நிறுவனம் வெளியிட்டுள்ள ஆய்வறிக்கை: இந்தியாவில், 2.45 லட்சம், ‘மெகா’ கோடீஸ்வரர்கள் உள்ளனர். இது, 2022ல், 3.72 லட்சமாக உயரும்.
சொத்து:
இந்திய குடும்பங்களின் சொத்து மதிப்பு, 5 லட்சம் கோடி டாலராக உள்ளது. இவற்றின் வருவாய், ஆண்டுக்கு, 7.5 சதவீதம் வளர்ச்சி கண்டு, 2022ல், 7.10 லட்சம் கோடி டாலராக அதிகரிக்கும். கடந்த, 2000 முதல், இந்திய குடும்பங்களின் சொத்து மதிப்பு, ஆண்டு க்கு, 9.9 சதவீதம் வளர்ச்சி கண்டு வருகிறது. இது, உலகின் சராசரி வளர்ச்சியான, 6 சதவீதத்தை விட அதிகம். இந்தாண்டு, இந்திய குடும்பங்களின் சொத்து மதிப்பு, 45,100 கோடி டாலர் உயர்ந்துள்ளதை அடுத்து, உலகளவில் சொத்து வளர்ச்சியில், இந்தியா, 8வது இடத்தை பிடித்துள்ளது.
அதே சமயம், இது, இந்திய மக்கள் அனைவரையும் உள்ளடக்கிய வளர்ச்சி அல்ல. ௧8 வயதிற்கு மேற்பட்ட, 92 சதவீதத்தினரின் சொத்து மதிப்பு, 10 ஆயிரம் டாலருக்கும் குறைவாகவே உள்ளது. 1 லட்சம் டாலருக்கு மேற்பட்ட சொத்து மதிப்பு வைத்துள்ளோரின் பங்கு, 0.5 சதவீதமாக, அதாவது, 42 லட்சமாக உள்ளது. உலகளவில், 18 வயதிற்கு மேற்பட்டோர் பிரிவில், முன்னணியில் உள்ள, 1 சதவீத பெரும் கோடீஸ்வரர்களில், 3.40 லட்சம் பேர், இந்தியாவில் உள்ளனர். இவர்களில், 1,820 பேரின் சொத்து மதிப்பு, 5 கோடி டாலருக்கும் அதிகமாக இருக்கிறது. 760 நபர்களுக்கு, 10 கோடி டாலருக்கு மேல் சொத்து உள்ளது.
கடன்:
தனிநபர் சொத்துகளில், ரியல் எஸ்டேட் மற்றும் பிற சொத்துகள், 86 சதவீத பங்கை கொண்டுள்ளன. மொத்த சொத்தில், தனிநபர் கடன்கள், 9 சதவீதம் என, மதிப்பிடப்பட்டு உள்ளது. இந்திய மக்கள் தொகையில், பெரும்பாலானோருக்கு கடன் சுமை உள்ளது. எனினும், இந்திய குடும்பங்களின் சொத்துகளுக்கு நிகரான கடன், வளர்ந்த நாடுகளை விட, குறைவாகவே உள்ளது. இந்தியாவில், ஓராண்டில், சந்தை மூலதனம், 30 சதவீதம் உயர்ந்துள்ளது. வீடு விலை, 10 சதவீதம் அதிகரித்துள்ளது. டாலருக்கு நிகரான ரூபாய் மதிப்பு, 4 சதவீதம் ஏற்றம் கண்டுள்ளது. இவ்வாறு அதில் கூறப்பட்டுள்ளது.
சுவிட்சர்லாந்து முதலிடம்:
ஜன., – ஜூன் வரை, உலகளவில், குடும்பங்களின் சொத்து மதிப்பு, 6.4 சதவீதம் வளர்ச்சி கண்டு, 280 லட்சம் கோடி டாலராக அதிகரித்துள்ளது. இது, 2012க்கு பிந்தைய வேகமான வளர்ச்சியாகும். பங்குச் சந்தைகள், நிதி சாரா சொத்துகள் போன்றவற்றில் கிடைத்த ஆதாயத்தால், சொத்து மதிப்பு உயர்ந்துள்ளது. உலகில், தனிநபர் சொத்து மதிப்பில், சுவிட்சர்லாந்து, 5.37 லட்சம் டாலருடன், முதலிடத்தை தக்க வைத்துக் கொண்டுள்ளது. அடுத்து, ஆஸ்திரேலியா, அமெரிக்கா ஆகிய நாடுகள் உள்ளன.
மேலும் பொது செய்திகள்
|
Advertisement
|
Advertisement
|
Advertisement
|
|
|
|