பதிவு செய்த நாள்
21 அக்2016
06:11
புதுடில்லி : பண்டிகை காலத்தையொட்டி, ‘மெகா’ மால்கள் எனப்படும், வணிக வளாகங்களில் உள்ள அங்காடிகளில், ‘டிவி, ரெப்ரிஜிரேட்டர், ஏசி’ உள்ளிட்ட நுகர்வோர் சாதனங்கள் விற்பனை, விறுவிறுப்பாக நடைபெற்று வருகிறது.
அதேசமயம், ‘அமேசான், ஸ்நாப்டீல்’ போன்ற வலைதள சந்தை நிறுவனங்கள், நுகர்வோர் பொருட்களுக்கு, தாராளமாக தள்ளுபடி சலுகைகளை வழங்குவதால், வணிக வளாக அங்காடிகள், கடுமையான சவாலை சந்தித்துள்ளதாக, ‘அசோசெம்’ அமைப்பு தெரிவித்து உள்ளது. இந்த அமைப்பு, டில்லி, மும்பை, சென்னை, ஆமதாபாத், சண்டிகர், ஐதராபாத், ஜெய்ப்பூர், பெங்களூரு அகிய நகரங்களில், வணிக வளாக குத்தகைதாரர்கள், நிர்வாக பிரதிநிதிகள், திட்ட வடிவமைப்பாளர்கள், சந்தைப்படுத்துவோர், மேற்பார்வையாளர்கள் உள்ளிட்ட, 750க்கும் அதிகமானோரிடம் ஆய்வு மேற்கொண்டது.
அதில், வலைதள சந்தை நிறுவனங்களின் போட்டியை சமாளிக்க, வணிக வளாக நிறுவனங்களும் வரிந்து கட்டி, தீவிரமாக களத்தில் குதித்துள்ளது தெரிய வந்துள்ளது. அவை, நுகர்வோர் சாதனங்களை தயாரிக்கும் நிறுவனங்களுடன் இணைந்து, இலவசங்கள், சுலப தவணை திட்டங்கள், தள்ளுபடி சலுகைகள் உள்ளிட்ட கவர்ச்சிகரமான அறிவிப்புகளை வெளியிட்டு, மக்களை கவர்ந்து இழுத்து வருகின்றன. இதன் விளைவாக, ஆய்வுக்கு எடுத்துக் கொள்ளப்பட்ட எட்டு நகரங்களில், வணிக வளாகங்களுக்கு வருவோர் எண்ணிக்கை, கிடு கிடுவென அதிகரித்திருப்பதும், பொருட்களின் விற்பனை, மள மளவென உயர்ந்துள்ளதும் தெரிய வந்துள்ளது.
டில்லியில் உள்ள சில வணிக வளாகங்களில், கடந்த வார இறுதியில், ஆடைகள், நகைகள், அழகுசாதனங்கள், உணவுப் பொருட்கள் விற்பனை, இதுவரை இல்லாத அளவிற்கு அதிகரித்து உள்ளது. அது போல, டிவி, மொபைல் போன், வாஷிங் மிஷின் உள்ளிட்ட நுகர்வோர் சாதனங்கள் விற்பனையும், சிறப்பான அளவிற்கு உயர்ந்துள்ளது. அதனால், நடப்பு, செப்., – டிச., வரையிலான மூன்றாவது காலாண்டில், விற்பனை வருவாய், குறிப்பிடத்தக்க அளவிற்கு உயரும் என, நுகர்வோர் சாதனங்கள் தயாரிப்பு மற்றும் சில்லரை விற்பனை நிறுவனங்கள் மதிப்பிட்டு உள்ளன.
இதன் காரணமாக, அவை, பண்டிகை காலத்திற்கு மட்டும், பொருட்களை சந்தைப்படுத்துவதற்கான பட்ஜெட்டை, 30 – 40 சதவீதம் அதிகரித்து உள்ளன. வணிக வளாக நிறுவனங்கள், கடந்த ஆண்டை விட, இந்தாண்டு பண்டிகை கால விற்பனை, 45 – 50 சதவீதம் உயரும் என, மதிப்பிட்டு உள்ளன.வணிக வளாக நிர்வாகிகள் கூறுகையில், ‘கடந்த ஆண்டை விட, இந்தாண்டு பண்டிகை கால விற்பனை, மதிப்பு மற்றும் அளவின் அடிப்படையில், முறையே, 20 சதவீதம் மற்றும், 10 – 15 சதவீதம் உயரும்’ என, தெரிவித்து உள்ளனர்.
மேலும் பொது செய்திகள்
|
Advertisement
|
Advertisement
|
Advertisement
|
|
|
|