பதிவு செய்த நாள்
22 மார்2017
05:24
மும்பை : ‘இந்தியா, முதலீட்டாளர்களின் விருப்பமான நாடாக உருவெடுத்து உள்ளதால், இந்தாண்டு, ரியல் எஸ்டேட் துறையில், 420 கோடி டாலர் அளவிற்கு, புதிய முதலீடுகள் குவிய வாய்ப்புள்ளது’ என,சர்வதேச ஆலோசனை நிறுவனமான, ‘குஷ்மன் அண்டு வேக்பீல்டு’ தெரிவித்துள்ளது.
அதன் விபரம்: உலகளவில், ரியல் எஸ்டேட் துறையில் இந்தாண்டு, 43,500 கோடி டாலர் அளவிற்கு, புதிய முதலீடுகள் குவியும் என, எதிர்பார்க்கப்படுகிறது. இதில், இந்தியா, 420 கோடி டாலரை ஈர்க்கும் என, மதிப்பிடப்பட்டு உள்ளது. கடந்த ஆண்டு, சர்வதேச ரியல் எஸ்டேட் துறையில், 44,300 கோடி டாலர் அளவிற்கு, புதிய முதலீடுகள் குவிந்தன. இதில், இந்தாண்டு, 2 சதவீதம் குறையும் என, மதிப்பிட்டுள்ள போதிலும், 2009க்கு பின் மேற்கொள்ளப்படும், இரண்டாவது அதிகபட்ச முதலீடாக இருக்கும்.
முதலீடுகளை ஈர்ப்பதற்கும், அவற்றின் பாதுகாப்பான வளர்ச்சிக்கும், மத்திய அரசின் வலுவான கொள்கைகள் துணை நிற்கின்றன. இதன் காரணமாக, உலக அளவில், முதலீடுகளுக்கு ஏற்ற முன்னணி நாடுகளில், இந்தியாவும் இடம் பிடித்துள்ளது. கடந்த ஒன்பது ஆண்டுகளில் இல்லாத அளவிற்கு, தனியார் பங்கு முதலீடுகளை, 2016ல், இந்தியா ஈர்த்துள்ளது. இந்தியாவில் அலுவலக இடங்களுக்கான தேவை அதிகரித்துள்ளதால், முதலீடுகளுக்கு ஏற்றவகையில், வாடகை வருவாய் கிடைக்கிறது. அதனால், இத்துறையில் முதலீடு செய்ய, சர்வதேச நிதி நிறுவனங்கள் ஆர்வம் காட்டுகின்றன. பல நிறுவனங்களின் முக்கிய கட்டுமான திட்டங்கள் கைமாற உள்ளதால், இந்தாண்டு, அலுவலக இடங்களுக்கான முதலீடு கள், இரு மடங்கு அதிகரிக்கும் என, எதிர்பார்க்கப்படுகிறது.
ரியல் எஸ்டேட் துறையை சீர்திருத்த, மத்திய, மாநில அரசுகள் எடுத்து வரும் நடவடிக்கைகளும், அறிமுகமாக உள்ள, ரியல் எஸ்டேட் இன்வெஸ்ட்மென்ட் டிரஸ்ட் போன்ற திட்டங்களும், அலுவலக இடங்களுக்கான முதலீடுகளை ஈர்க்க துணை புரிந்து வருகின்றன.இவ்வாறு அதில் கூறப்பட்டு உள்ளது.
ஆசிய பசிபிக் நாடுகள்சர்வதேச ரியல் எஸ்டேட் முதலீடுகளில், ஆசிய பசிபிக் நாடுகளின் பங்களிப்பு, 30 சதவீதமாக உள்ளது. ரியல் எஸ்டேட் துறையில், முதலீடுகளுக்கு மிகவும் உகந்த, ‘டாப் – 10’ நாடுகளில், ஆசிய பசிபிக் பிராந்தியத்தைச் சேர்ந்த, சீனா, ஜப்பான், ஆஸ்திரேலியா, ஹாங்காங் ஆகியவை இடம் பெற்று உள்ளன. சிங்கப்பூர், 12வது இடத்தையும், 15வது இடத்தை இந்தியாவும் பிடித்துள்ளன.
மேலும் பொது செய்திகள்
|
Advertisement
|
Advertisement
|
Advertisement
|
|
|
|