பதிவு செய்த நாள்
25 செப்2018
23:45
புதுடில்லி : கோல்கட்டாவை சேர்ந்த, பிரபல பிஸ்கட் தயாரிப்பு நிறுவனமான, அன்மோல் இண்டஸ்ட்ரீஸ், பங்கு வெளியீட்டின் மூலம் நிதி திரட்டிக்கொள்ள, பங்குச் சந்தை கட்டுப்பாட்டு அமைப்பான, ‘செபி’ அனுமதி வழங்கி உள்ளது.
அன்மோல் நிறுவனம், பங்கு வெளியீட்டின் மூலம், 750 கோடி ரூபாயை திரட்ட திட்டமிட்டுள்ளது. இந்நிறுவனம், வருவாய் அடிப்படையில், நாட்டின் நான்காவது பெரிய பிஸ்கட் நிறுவனமாகும். மேலும், கேக் விற்பனையில் வருவாய் ஈட்டும் நிறுவனங்களில், ஐந்தாவது பெரிய நிறுவனமுமாகும். இந்தியாவின் வடக்கு மற்றும் கிழக்கு மாநிலங்களில் வலுவாக இருக்கும் நிலையில், தற்போது, தெற்கு மற்றும் மேற்கு மாநிலங்களிலும், காலுான்ற திட்டமிடுகிறது. கடந்த, 2016 -– -17 நிதியாண்டில், இந்நிறுவனத்தின் நிகர வருமானம் 1,240 கோடி ரூபாய் ஆகும். நிகர லாபம், 72 கோடி ரூபாய்.
பிளேர் ரைட்டிங்:
எழுதுபொருட்கள் நிறுவனமான, பிளேர் ரைட்டிங் இண்டஸ்ட்ரீஸ், பங்கு வெளியீட்டுக்கு அனுமதி கேட்டு, செபியிடம் விண்ணப்பித்து உள்ளது. இந்நிறுவனம், பங்கு வெளியீட்டின் மூலமாக, 450 கோடி ரூபாய் திரட்ட திட்டமிட்டுள்ளது. இதில், 330 கோடி ரூபாய்க்கு புதிய பங்குகளை வெளியிட உள்ளது.
பங்கு வெளியீட்டின் மூலமாக திரட்டப்படும் நிதியில், 132.88 கோடி ரூபாயை இயந்திரங்கள் வாங்கவும்; 69.51 கோடி ரூபாயில் குஜராத்தில், புதிய ஆலைக்கான கட்டடங்கள் உள்ளிட்டவற்றுக்காகவும்; 15 கோடி ரூபாயை கடன்களை அடைக்கவும்; மீதியை மூலதன செலவுகளுக்காகவும் செலவிட முடிவு செய்துள்ளது. இந்நிறுவன பங்கு வெளியீட்டுக்கான பணிகளை, ஆக்சிஸ் கேப்பிட்டல் மற்றும் எடல்வைஸ் பைனான்ஷியல் சர்வீசஸ் நிறுவனங்கள் மேற்கொள்கின்றன.
ஆனந்த் ரதி
நிதிச் சேவைகள் வழங்கும் நிறுவனமான, ஆனந்த் ரதி வெல்த் சர்வீசஸ் பங்கு வெளியீட்டுக்கு வருவதற்காக செபியிடம் விண்ணப்பித்து உள்ளது. இந்நிறுவனம், 425 கோடி ரூபாயை, பங்கு வெளியீட்டின் மூலம் திரட்ட உள்ளதாக தெரிவித்துள்ளது. இதில், 125 கோடி ரூபாய்க்கு புதிய பங்கு களும், 300 கோடி ரூபாய்க்கு நிறுவனர்களின் பங்குகளும் வெளியிடப்பட உள்ளன.
ஈக்யுரஸ் கேப்பிட்டல் மற்றும் ஜெப்ரீஸ் இந்தியா ஆகிய நிறுவனங்கள், இந்நிறுவனத்தின் பங்கு வெளியீட்டுக்கான பணிகளை மேற்கொள்கின்றன. திரட்டப்படும் தொகை, மென்பொருள் மற்றும் தொழில்நுட்பங்களுக்காகவும், மும்பை அலுவலகத்தை மேம்படுத்தவும் பயன்படுத்தப்படும் என, இந்நிறுவனம் தெரிவித்துள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|