பதிவு செய்த நாள்
04 மார்2018
00:18
மும்பை:அனைத்து வாகனங்களுக்கான தேவை அதிகரித்து உள்ளதால், வாகன உதிரி பாகங்கள் துறையின் வருவாய் வளர்ச்சி மதிப்பீட்டை, தர நிர்ணய நிறுவனமான, ‘இக்ரா’ மேலும் உயர்த்தி உள்ளது.
இது குறித்து, இந்நிறுவனம் வெளியிட்டுள்ள அறிக்கை:
இந்தியாவில், அனைத்து வகை வாகனங்களுக்கான தேவை அதிகரித்து உள்ளதால், அதை சார்ந்துள்ள வாகன உதிரி பாகங்கள் துறை வளர்ச்சியும், ஏறுமுகத்தில் உள்ளது.வாகன உதிரி பாகங்கள் துறையின் மொத்த விற்றுமுதலில், 48 சதவீத நிறுவனங்கள், 26 சதவீத பங்களிப்பை வைத்துள்ளன. இந்நிறுவனங்கள், நடப்பு, 2017 – -18ம் நிதியாண்டின், அக்., – டிச., காலாண்டில், 18.5 சதவீத வருவாய் வளர்ச்சியை கண்டுள்ளன.
ஏற்றுமதி
உள்நாட்டில், பயணியர் வாகனங்கள், வர்த்தக வாகனங்கள், டிராக்டர் மற்றும் இருசக்கர வாகனங்கள் விற்பனை அமோகமாக உள்ளது. இதனால், வாகனங்களுக்கான, உதிரி பாகங்கள் விற்பனையும் நன்கு உள்ளது.இதன் காரணமாக, நடப்பு நிதியாண்டில், ஏப்., – டிச., வரையிலான, ஒன்பது மாதங்களில், வாகன உதிரி பாகங்கள் துறையின் வருவாய் வளர்ச்சி, ஏற்கனவே மதிப்பிடப்பட்ட, 9 – - 11 சதவீதத்தில் இருந்து, 12.3 சதவீதமாக அதிகரித்து உள்ளது.இவ்வளர்ச்சி, நடப்பு, ஜன., – மார்ச் காலாண்டில், மேலும் அதிகரிக்கும் என, எதிர்பார்க்கப்படுகிறது.
இதன் காரணமாக, முழு நிதியாண்டிற்கான, வாகன உதிரி பாகங்கள் துறையின் வருவாய் வளர்ச்சி, முந்தைய மதிப்பீடான, 9 – -11 சதவீதத்தில் இருந்து, 13 – -15 சதவீதமாக உயர்த்தி நிர்ணயிக்கப்பட்டு உள்ளது.உள்நாட்டில், குறிப்பாக, பயணியர் வாகனங்கள் மற்றும் இருசக்கர வாகனங்கள் விற்பனை அதிகரித்து வருகிறது. இந்த இரு பிரிவுகளும், வாகன உதிரி பாகங்கள் துறையில், மூன்றில் இரு பங்குடன், வளர்ச்சிக்கு முக்கிய பங்களிப்பை வழங்குகின்றன.
எனினும், உள்நாட்டில் பயணியர் வாகனங்களுக்கான தேவை உயர்ந்த அளவிற்கு, அவற்றின் எண்ணிக்கை அடிப்படையிலான ஏற்றுமதி, முந்தைய இரு காலாண்டுகளில் உயரவில்லை. வரும் காலாண்டுகளில், இந்த தொய்வு சரியாகும்.
தேவை அதிகரிப்பு
அவ்வாறு இல்லையென்றாலும், அதை ஈடு செய்யும் அளவிற்கு, உள்நாட்டு வாகன விற்பனை வளர்ச்சி இருக்கும். வர்த்தக வாகனங்கள் மற்றும் டிராக்டர் பிரிவுகளும், இத்துறையின் ஒட்டுமொத்த வளர்ச்சிக்கு உதவி வருகின்றன.அடிப்படை கட்டமைப்பு துறை சார்ந்த பணிகள் வேகமெடுத்து உள்ளதால், கட்டுமானம், சுரங்கம் ஆகிய துறைகளில் பயன்படும், ‘டிப்பர்’ லாரிகள் உள்ளிட்ட கனரக வாகனங்களுக்கான தேவை அதிகரித்துள்ளது. இதுவும், வாகன உதிரி பாகங்கள் துறையின் ஏற்றத்திற்கு துணை புரிகிறது.இவ்வாறு அதில் கூறப்பட்டுள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|