பதிவு செய்த நாள்
15 அக்2013
00:08
புதுடில்லி : மொத்த விலை குறியீட்டு எண் அடிப்படையில் கணக்கிடப்படும், நாட்டின் பொதுப் பணவீக்கம், சென்ற செப்டம்பர் மாதத்தில், 6.46 சதவீதமாக அதிகரித்துள்ளது என, மத்திய அரசு வெளியிட்டுள்ள புள்ளிவிவரத்தில் தெரிவிக்கப்பட்டுள்ளது. கடந்த ஜூலை மாதத்தில், நாட்டின் பொதுப் பணவீக்கம், 5.85 சதவீதமாக இருந்தது. இது, ஆகஸ்ட் மாதத்தில், 6.1 சதவீதமாக அதிகரித்தது. வட்டி விகிதம் வங்கி மற்றும் சந்தை வட்டாரத்தினர், வங்கிகளுக்கான வட்டி விகிதம் குறைக்கப்படும் என்று எதிர்பார்த்த நிலையில், பணவீக்கம் அதிகரித்ததால், ரிசர்வ் வங்கியின் புதிய கவர்னராக பொறுப்பேற்ற ரகுராம் ராஜன், சென்ற மாதம் 20ம் தேதி, "ரெப்போ" வட்டி விகிதத்தை, 0.25 சதவீதம் உயர்த்தினார்.
இதையடுத்து, வங்கிகள் குறைந்த கால அடிப்படையில், ரிசர்வ் வங்கியிடமிருந்து பெறும் கடனுக்கான வட்டி விகிதம் (ரெப்போ) 7.25 சதவீதத்திலிருந்து, 7.50 சதவீதமாக உயர்த்தப்பட்டது. இருப்பினும், தினசரி கடனுக்கான வட்டி விகிதம், 10.25 சதவீதத்திலிருந்து, 9 சதவீதமாக குறைக்கப்பட்டது. சென்ற செப்டம்பரில், வெங்காயத்தின் விலை, ஆண்டு கணக்கில், 323 சதவீதம் அதிகரித்திருந்தது. இதுவே, பொதுப் பணவீக்கம் அதிகரிப்பிற்கு முக்கிய காரணம் என, கூறப்படுகிறது.
இது தவிர, காய்கறிகளின் விலை, 89.37 சதவீதம் என்ற அளவிலும், பழங்களின் விலை, 13.54 சதவீதம் என்ற அளவிலும் அதிகரித்திருந்தது. கணக்கீட்டு மாதத்தில், உணவு பணவீக்கம், 18.40 சதவீதமாக அதிகரித்துள்ளது. இது, இதற்கு முந்தைய ஆகஸ்ட் மாதத்தில், 18.18 சதவீதமாக காணப்பட்டது.கணக்கீட்டு மாதத்தில், இயற்கை எரிவாயு மற்றும் பெட்ரோல் ஆகியவற்றின் விலை முறையே, 9 சதவீதம் மற்றும் 9.64 சதவீதம் என்ற அளவில் அதிகரித்திருந்தது. இருப்பினும், முட்டை, இறைச்சி, மீன்கள், குளிர்பானம் உள்ளிட்ட தயாரிப்பு பொருட்கள், புகையிலை பொருட்கள் போன்றவற்றின் விலை குறைந்திருந்தது.
தயாரிப்பு துறை சார்ந்த பணவீக்கம், கணக்கீட்டு மாதத்தில், ஆண்டுக் கணக்கில், 2.03 சதவீதம் அதிகரித்திருந்தது. சில்லரை பணவீக்கம்ரிசர்வ் வங்கியின் இரண்டாவது காலாண்டிற்கான நிதி ஆய்வு கொள்கை, இம்மாதம், 29ம் தேதி அறிவிக்கப்பட உள்ளது. பணவீக்கம் அதிகரித்துள்ளதால், வங்கிகளுக்கான வட்டி விகிதம் குறைக்கப்படுமா என்பது கேள்விக்குறியாக உள்ளது. இதற்கிடையே, நுகர்பொருள் குறியீட்டு எண் அடிப்படையில் கணக்கிடப்படும், சில்லரை பணவீக்கம், சென்ற செப்டம்பரில், 9.84 சதவீதம் என்ற அளவில் உயர்ந்து உள்ளது. இது, இதற்கு முந்தைய ஆகஸ்ட் மாதத்தில், 9.52 சதவீதம் என்ற அளவில் இருந்தது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|