மும்பை : கடந்த எட்டு மாதங்களுக்கு பிறகு முதன்முறையாக ரூபாயின் மதிப்பு அதிகளவு உயர்ந்து, ரூ.60-க்கு கீழ் சென்று ரூ.59.91-ஆக முடிந்தது. இன்றைய(மார்ச் 28ம் தேதி, வெள்ளிக்கிழமை) வர்த்தகநேர துவக்கத்தின் போது (காலை 9.15 மணி) அந்நிய செலாவணி சந்தையில், அமெரிக்க டாலருக்கு எதிரான இந்திய ரூபாயின் மதிப்பு, 18 காசுகள் உயர்ந்து 60.12-ஆக இருந்தது. தொடர்ந்து உயர்வுடனேயே இருந்த ரூபாயின் மதிப்பு இறுதியில் வர்த்தகநேர முடிவில் 66 காசுகள் உயர்ந்து ரூ.59.91-ஆக முடிந்தது. கடந்த எட்டு மாதங்களுக்கு பிறகு இன்று தான் ரூபாயின் மதிப்பு இந்தளவுக்கு உயர்ந்துள்ளது. 

உள்நாட்டு பங்குசந்தையில் காணப்பட்ட ஏற்றம், ஏற்றுமதியாளர்கள், வங்கிககள் அதிகளவு அமெரிக்க டாலரை விற்பனை செய்தது போன்ற காரணங்களால் இந்திய ரூபாயின் மதிப்பில் உயர்வு காணப்படுவதாக சந்தை வல்லுநர்கள் தெரிவித்துள்ளனர். முன்னதாக நேற்று ரூபாயின் மதிப்பு ரூ.60.31-ஆக இருந்தது.