பதிவு செய்த நாள்
28 ஏப்2017
23:57
மும்பை : கடந்த, 2016 – 17ம் நிதியாண்டில், இந்தியாவின் நவரத்தினங்கள் மற்றும் தங்க ஆபரணங்கள் ஏற்றுமதி, 12.32 சதவீதம் அதிகரித்து, 2.89 லட்சம் கோடி ரூபாயாக உயர்ந்துள்ளது. இது, முந்தைய, 2015 – 16ம் நிதியாண்டில், 2.57 லட்சம் கோடி ரூபாயாக இருந்தது.
இது குறித்து, நவரத்தினங்கள் மற்றும் தங்க ஆபரணங்கள் ஏற்றுமதி மேம்பாட்டு அமைப்பின் தலைவர் பிரவீன் சங்கர் பாண்டியா கூறியதாவது: கடந்த நிதியாண்டில், அமெரிக்கா, ஹாங்காங், மத்திய கிழக்கு பிராந்தியம் உள்ளிட்ட, முக்கிய ஏற்றுமதி நாடுகளின் பொருளாதாரம் வளர்ச்சி கண்டுள்ளது. இதனால், அந்நாடுகளுக்கான, நவரத்தினங்கள் மற்றும் தங்க ஆபரணங்கள் ஏற்றுமதி அதிகரித்து உள்ளது. இத்துறையின் ஏற்றுமதி, நடப்பு, 2017 – 18ம் நிதியாண்டில், 10 சதவீதம் அதிகரிக்கும் என, மதிப்பிடப்பட்டு உள்ளது.
கடந்த நிதியாண்டில், நறுக்கப்பட்ட மற்றும் பட்டை தீட்டப்பட்ட வைரங்கள் ஏற்றுமதி, 12.6 சதவீதம் உயர்ந்து, 1.52 லட்சம் கோடி ரூபாயாக அதிகரித்துள்ளது. இது, முந்தைய நிதிஆண்டில், 1.35 லட்சம் கோடி ரூபாயாக இருந்தது. இதே காலத்தில், தங்க நகைகள் ஏற்றுமதி, 4.14 சதவீதம் வளர்ச்சி கண்டு, 56,138 கோடி ரூபாயில் இருந்து, 58,464 கோடி ரூபாயாக உயர்ந்துள்ளது. அர்மீனியா, கஜகஸ்தான் போன்ற காமன்வெல்த் சுயேச்சை நாடுகளிலும், நவரத்தினங்கள், தங்க ஆபரணங்கள் ஆகியவற்றுக்கான தேவை அதிகரித்து உள்ளது.இறக்குமதிகடந்த நிதியாண்டில், நவரத்தினங்கள், தங்க ஆபரணங்கள் இறக்குமதி, முந்தைய நிதியாண்டை விட, 21.53 சதவீதம் உயர்ந்து, 1.58 லட்சம் கோடி ரூபாயில் இருந்து, 1.92 லட்சம் கோடி ரூபாயாக அதிகரித்துள்ளது.
அதே சமயம், இதே காலத்தில், நறுக்கப்பட்ட மற்றும் பட்டை தீட்டப்பட்ட வைரங்கள் இறக்குமதி, 2.80 சதவீதம் சரிவடைந்து, 18,128 கோடி ரூபாயில் இருந்து, 17,620 கோடி ரூபாயாக குறைந்துள்ளது. இதே காலத்தில், கச்சா வைரங்கள் இறக்குமதி, 24.47 சதவீதம் அதிகரித்து, 91,970 கோடி ரூபாயில் இருந்து, 1.14 லட்சம் கோடி ரூபாயாக உயர்ந்துள்ளது. இது, உலகின் வைர மையமாக, இந்தியாவை உருவாக்க வேண்டும் என்ற நோக்கத்திற்கு, வலு சேர்ப்பதாக உள்ளது. இதே வளர்ச்சி தொடர்ந்தால், 2022ல், நவரத்தினங்கள் மற்றும் தங்க ஆபரணங்கள் வர்த்தகத்தில், இந்தியா முதலிடத்தை பிடிக்கும். இவ்வாறு அவர் கூறினார்.
வெள்ளியும் வளர்ச்சி:
அமெரிக்கா, ஹாங்காங், ஐக்கிய அரபு நாடுகள் ஆகியவற்றில், வெள்ளி ஆபரணங்களுக்கான தேவை பெருகி வருகிறது. அதனால், அந்நாடுகளில் ஏற்றுமதியாளர்கள் கவனம் செலுத்தத் துவங்கி உள்ளனர். கடந்த நிதியாண்டில், வெள்ளி ஆபரணங்கள் ஏற்றுமதி, 38.64 சதவீதம் உயர்ந்து, 19,417 கோடி ரூபாயில் இருந்து, 26,921 கோடி ரூபாயாக அதிகரித்துள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|