பதிவு செய்த நாள்
24 நவ2017
23:53
புதுடில்லி : ஜி.எஸ்.டி., எனப்படும், சரக்கு மற்றும் சேவை வரி குறைக்கப்பட்ட பின்னரும், பழைய வரி வசூலித்து, கொள்ளை லாபம் பார்க்கும் வியாபாரிகள், வணிக நிறுவனங்கள் மீது, பொதுமக்கள் புகார் தெரிவிக்க வசதி செய்யப்பட்டு உள்ளது.
இது குறித்து, மத்திய மறைமுக வரிகள் மற்றும் சுங்க வரி வாரியம் வெளியிட்டுள்ள அறிக்கை: ஜி.எஸ்.டி., கவுன்சில், பெருவாரியான பொருட்களுக்கான, 28 சதவீத வரியை, 18 சதவீதமாக குறைத்துள்ளது. பல பொருட்களின் வரி, 5 சதவீதமாக குறைக்கப்பட்டு உள்ளது. தற்போது, 50 பொருட்கள் மட்டுமே, அதிகபட்சமான, 28 சதவீத வரி வரம்பில் உள்ளன. சேவை துறையில், ‘ஏசி’ மற்றும் சாதாரண ஓட்டல்களுக்கு விதிக்கப்பட்டிருந்த, 18 மற்றும் 12 சதவீத வரி, தற்போது ஒரே சீராக, 5 சதவீதம் என, குறைத்து நிர்ணயிக்கப்பட்டு உள்ளது. இந்த வரி குறைப்பால், சிறிய வியாபாரிகள் மற்றும் நுகர்வோர் பெரும் பயன் அடைவர்.
பொருட்கள் வாங்கும் போது, குறைக்கப்பட்ட வரி விகிதப்படி, பணம் வசூலிக்கப்படுகிறதா என்பதை, நுகர்வோர் கவனிக்க வேண்டும். www.cbec.gov.in வலைதளத்தில், பொருட்களுக்கான புதிய வரி விகிதத்தை, நுகர்வோர் அறிந்து கொள்ளலாம். ஜி.எஸ்.டி., கொள்ளை லாப தடுப்பு சட்டப்படி, குறைக்கப்பட்ட வரியின் பயனை, வணிக நிறுவனங்களும், வியாபாரிகளும், நுகர்வோருக்கு வழங்க வேண்டும். அதன்படி, பொருட்களின் விலையை குறைக்க வேண்டும். சரக்கு மற்றும் சேவைகளில், நியாயமற்ற வகையில் பெற்ற கூடுதல் ஆதாயத்தை, வட்டியுடன் நுகர்வோருக்கு வழங்க, சட்டம் வகை செய்கிறது.
தவறு செய்வோரின் வர்த்தக உரிமத்தை ரத்து செய்வது உள்ளிட்ட நடவடிக்கைகள் எடுக்க முடியும். இதன்படி, கொள்ளை லாபமீட்டும் நோக்குடன்நடந்து கொள்ளும் வியாபாரிகள், வணிக நிறுவனங்கள் மீது, அதற்கென அமைக்கப்பட்ட குழுக்களிடம், நுகர்வோர் புகார் தெரிவிக்கலாம். இந்த விபரங்களை, www.cbec.gov.inல் காணலாம். ஜி.எஸ்.டி., தொடர்பாக, வியாபாரிகள், வணிக நிறுவனங்களுக்கு உள்ள சந்தேகங்களுக்கு விளக்கம் அளிக்கவும், அவர்களுக்கு உதவவும், ஜி.எஸ்.டி., சேவா கேந்திரங்கள் செயல்படுகின்றன.
சென்னை, நுங்கம்பாக்கத்தில், வரித்துறை தலைமை கமிஷனர் அலுவலகத்திலும், தேனாம்பேட்டை, அம்பத்துார், அண்ணா நகர் ஆகிய நான்கு இடங்களில் உள்ள, துணை கமிஷனர் அலுவலகங்களிலும், இப்பிரிவுகள் செயல்படுகின்றன. அங்கு, ஜி.எஸ்.டி., தொடர்பான அனைத்து உதவிகளையும் பெறலாம். இவ்வாறு அதில் கூறப்பட்டுள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|