பதிவு செய்த நாள்
12 ஜன2013
00:18
சென்ற 2012ம் ஆண்டில், தனியார் பங்கு முதலீட்டை அதிகளவில் கவர்ந்ததில், தென் மாநிலங்களை சேர்ந்த நிறுவனங்கள் முன்னிலை வகிக்கின்றன என, வென்சர்ஸ் இன்டலிஜன்ஸ் நிறுவனம் தெரிவித்துஉள்ளது.
பெங்களூரு:மதிப்பீட்டு ஆண்டில், தென்மாநில நிறுவனங்கள், 162 ஒப்பந்தங்கள் வாயிலாக, 246 கோடி டாலரை (13,470 கோடி ரூபாய்) திரட்டி முன்னிலையில் உள்ளன.குறிப்பாக, பெங்களூரைச் சேர்ந்த நிறுவனங்கள், 88 ஒப்பந்தங்கள் வாயிலாக, 117 கோடி டாலரை (6,435 கோடி ரூபாய்) திரட்டி முதலிடத்தை பிடித்துள்ளன.
ஆரோக்கிய பராமரிப்பு:தென்மாநில தகவல் தொழில்நுட்ப நிறுவனங்களில் அதிகளவில், தனியார் முதலீட்டு ஒப்பந்தங்கள் மேற்கொள்ளப்பட்டுள்ளன. அதேசமயம், அதிக மதிப்பிலான முதலீட்டு ஒப்பந்தங்களை கவர்ந்ததில், ஆரோக்கிய பராமரிப்பு துறை முதலிடத்தில் உள்ளது.இதற்கு எடுத்துக்காட்டாக, சென்ற 2012ம் ஆண்டின் செப்டம்பர் மாதத்தில், இந்தியா வேல்யூ பண்டு என்ற தனியார் பங்கு முதலீட்டு நிறுவனம், பெங்களூரைச் சேர்ந்த மணிப்பால் ஹெல்த் எண்டர்பிரைசஸ் நிறுவனத்தில், 18 கோடி டாலரை (990 கோடி ரூபாய்) முதலீடு செய்துள்ளது.
இதையடுத்து, ஐதராபாத்தைச் சேர்ந்த, "கேர்' ஹாஸ்பிட்டல் குழுமத்தில், அட்வென்ட் இன்டர்நேஷனல் நிறுவனம், 11 கோடி டாலரையும், கொச்சியைச் சேர்ந்த டி.எம்.ஹெல்த் கேர் நிறுவனத்தில், ஒலிம்பஸ் கேப்பிட்டல் நிறுவனம், 10 கோடி டாலரையும் முதலீடு செய்துள்ளன.
தமிழகத்தில் ஆரோக்கிய பராமரிப்பு துறையில் ஈடுபட்டு வரும், திருச்சியைச் சேர்ந்த வாசன் ஐ கேர் நிறுவனம், சென்ற ஆண்டு, மார்ச் மாதத்தில், தனியார் பங்கு முதலீட்டு நிறுவனமான ஜி.ஐ.சி.,-யிடமிருந்து, 10 கோடி டாலரை (550 கோடி ரூபாய்) திரட்டிக் கொண்டது.
பொருளாதார சுணக்க நிலையால், பாதிப்படையாத துறைகளில் ஒன்றாக ஆரோக்கிய பராமரிப்பு துறை விளங்குகிறது. இதன் காரணமாகவே, இத்துறையைச் சேர்ந்த நிறுவனங்கள், சென்ற ஆண்டில் அதிக அளவிலான தனியார் பங்கு முதலீட்டை திரட்டிக் கொண்டுள்ளன என, வென்சர் இன்டலிஜன்ஸ் ஆய்வு நிறுவனத்தின் நிறுவனர் அருண் நடராஜன் கூறினார்.
சென்னையைச் சேர்ந்த மருத்துவ உபகரணங்கள் தயாரிப்பு நிறுவனமான டிரிவிட்ரான் ஹெல்த்கேர், பிடிலிட்டி குரோத் பார்ட்னர் என்ற தனியார் பங்கு முதலீட்டு நிறுவனத்திடமிருந்து, 7.50 கோடி டாலரை திரட்டிக் கொண்டுள்ளது. இதே போன்று, பெங்களூரைச் சேர்ந்த அவெஸ்தாஜென் நிறுவனம், 6 கோடி டாலரையும், நோவா மெடிக்கல் சென்டர்ஸ், 5.40 கோடி டாலரையும் திரட்டிக் கொண்டுள்ளன.
டி.வி.எஸ்., நிறுவனம் :பொறியியல் துறையை பொறுத்தமட்டில், பெங்களூரைச் சேர்ந்த நந்தி இக்னாமிக் காரிடார் எண்டர் பிரைசஸ், 6.50 கோடி டாலரையும், மதுரையைச் சேர்ந்த டி.வி.எஸ். லாஜிஸ்டிக்ஸ் சர்வீசஸ் நிறுவனம், 5.30 கோடி டாலரையும் திரட்டிக் கொண்டுள்ளன.
மேலும் பொது செய்திகள்
|
Advertisement
|
Advertisement
|
Advertisement
|
|
|
|