மும்பை : ஐடி துறை உள்ளிட்ட முக்கிய நிறுவனங்களின் பங்குகள் ஏற்றம் அடைந்திருந்ததாலும், புதிய முதலீடுகள் வரத் துவங்கி உள்ளதாலும் இந்திய பங்குச் சந்தைகள் இன்று ஏற்றத்துடன் வர்த்தகத்தை துவக்கின. இருப்பினும் பங்குச்சந்தைகள் துவங்கிய ஒரு சில நிமிடங்களிலேயே பங்குச் சந்தைகள் கடுமையாக சரிய துவங்கின. ரிசர்வ் வங்கி கவர்னராக மீண்டும் தான் தொடர விரும்பவில்லை என ரிசர்வ் வங்கி கவர்னர் ரகுராம் ராஜன் கூறியதை அடுத்து, முதலீட்டாளர்கள் ஏமாற்றம் அடைந்துள்ளனர். ஆனாலும் சற்றுநேரத்தில் பங்குச்சந்தைகள் மீண்டும் ஏற்றம் கண்டன.

வாரத்தின் முதல் வர்த்தக நாளான இன்று வர்த்தக நேர துவக்கத்தின் போது சென்செக்ஸ் 159.76 புள்ளிகள் சரிந்து 26,466.15 புள்ளிகளாகவும், நிப்டி 54.45 புள்ளிகள் சரிந்து 8115.75 புள்ளிகளாகவும் இருந்தன.  காலை 10.15 மணியளவில் சென்செக்ஸ் 75 புள்ளிகள் உயர்ந்து 26,700-ஆகவும், நிப்டி 18 புள்ளிகள் உயர்ந்து 8,188-ஆகவும் இருந்தன. ஏற்ற - இறக்கத்தால் பங்குச்சந்தைகளில் தள்ளாட்டம் நிலவுகிறது.

இதனிடையே, ரகுராம் ராஜனின் முடிவு எதிரொலி காரணமாக சர்வதேச அந்நிய செலாவணி சந்தையில் இந்திய ரூபாயின் மதிப்பு 60 காசுகளுக்கு மேல் சரிந்து ரூ.67.79 ஆக இருந்தது.