பதிவு செய்த நாள்
08 ஜூலை2016
04:43
புதுடில்லி : ‘வாகனங்களை பதிவு செய்யும் பணியை, ‘ஆர்.டி.ஓ.,’ எனப்படும் வட்டார போக்குவரத்து அலுவலகத்திடம் இருந்து, வாகன விற்பனை முகவர்களுக்கு மாற்றலாம்’ என, சாலை போக்குவரத்து தொடர்பான அமைச்சரவைக்குழு, மத்திய அரசுக்கு பரிந்துரைத்துள்ளது.
ராஜஸ்தான் போக்குவரத்து துறை அமைச்சர் யூனுஸ்கான் தலைமையில் அமைக்கப்பட்ட குழு, சாலை போக்குவரத்து துறையில் செய்ய வேண்டிய சீர்திருத்தங்கள் குறித்து, 34 பரிந்துரைகளை, மத்திய சாலை போக்கு வரத்து மற்றும் நெடுஞ்சாலை துறையிடம் வழங்கியுள்ளது.
அதன் விபரம்:வாகனப் பதிவை, தற்போது, வட்டார போக்குவரத்து அலுவலகங்கள் மேற்கொள்கின்றன. பதிவுக்காக வரும் வாகனங்கள் எண்ணிக்கை, கிடு கிடுவென உயர்ந்து வருகிறது. அதை சமாளிக்கக்கூடிய அளவிற்கு, போதிய, பணியாளர்கள் இல்லாமல், வட்டார போக்குவரத்து அலுவலகங்கள் திணறுகின்றன. இது, லஞ்ச ஊழலுக்கு வழி வகுக்கிறது.
பழைய வாகனங்கள் விற்பனையில், உரிமை மாற்றம் கோரும் விண்ணப்பங்களையும், ஆர்.டி.ஓ., அலுவலகம் பரிசீலிக்கிறது.புதிய வாகனங்களை விட, மூன்று மடங்கு அதிகமாக, பழைய வாகனங்களின் உரிமையை மாற்றுவதற்கு விண்ணப்பங்கள் வருவதால், ஆர்.டி.ஓ., பணிச்சுமை மேலும் அதிகரித்துள்ளது.அதனால், புதிய வாகனங்களை பதிவு செய்யும் உரிமையை, விற்பனை முகவர்களிடமே வழங்கலாம். அவர்கள், வாகன விற்பனையில், உரிமையாளரின் முழு விவரங்களையும் கையாள்வதால், பதிவு செய்யும் பணியை சுலபமாக மேற்கொள்ள முடியும். இதனால், ஆர்.டி.ஓ., பணிச்சுமையும் குறையும்.
தற்போது, 18 வயது பூர்த்தியானோர் மட்டுமே, ஓட்டுனர் உரிமத்துக்கு விண்ணப்பிக்க முடியும். இதை, 16 வயதாக குறைத்து, 100 சி.சி., திறன் கொண்ட, ‘கியர்’ இல்லாத வண்டிகளை மட்டும் ஓட்ட அனுமதிக்கலாம். பயிற்சி ஓட்டுனர் விண்ணப்பத்தை, வலைதளத்தில் வெளியிட்டு, அதன் வாயிலாகவே விண்ணப்பிக்கவும், பயிற்சி ஓட்டுனர் உரிமம் பெறவும், நடவடிக்கை எடுக்க வேண்டும்.இரண்டாவது முறையாக, வாகனங்களை மிக வேகமாக ஓட்டினால், வசூலிக்கும் அபராதத்தை, இரண்டாயிரத்தில் இருந்து, 10 ஆயிரம் ரூபாயாக உயர்த்த வேண்டும். குடித்துவிட்டு கார் ஓட்டுபவர்களுக்கு, ஆறு மாதம் சிறை தண்டனையும், 5,000 ரூபாய் அபராதமும் விதிக்க வேண்டும். ஓட்டுனர் உரிமத்தை, இரண்டு ஆண்டுகளுக்கு ரத்து செய்ய வேண்டும்.இவ்வாறு அதில் கூறப்பட்டு உள்ளது.
கடந்த, 2015 –16ம் நிதிஆண்டில், 2.05 கோடி வாகனங்கள் விற்பனையாகி உள்ளன. அவற்றில், 1.65 கோடி இரு சக்கர வாகனங்கள்; 27.80 லட்சம் பயணிகள் வாகனங்கள்; 13 லட்சம் இதர வாகனங்கள்.
மேலும் பொது செய்திகள்
|
Advertisement
|
Advertisement
|
Advertisement
|
|
|
|