மும்பை : ரெப்போ வட்டி விகிதத்தை 0.25 சதவீதம் குறைத்து ரிசர்வ் வங்கியின் புதிய கவர்னர் உர்ஜித் பட்டேல் தனது முதல் அறிவிப்பை வெளியிட்டுள்ளார். இது கடந்த 6 ஆண்டுகளில் இல்லாத அளவுக்கு குறைந்துள்ளது.

ரிசர்வ் வங்கியின் கவர்னராக இருந்த ரகுராம் ராஜன், தனது பதவிகாலத்தை முடித்ததையடுத்து புதிய கவர்னராக உர்ஜித் பட்டேல் நியமிக்கப்பட்டார். இந்நிலையில், ரிசர்வ் வங்கியின் மாதாந்திர கூட்டம் அவர் தலைமையில் நடந்தது. இது அவரின் முதல்கூட்டம், மேலும் பணவீக்கம் கட்டுக்குள் இருப்பது, நாட்டின் பொருளாதார வளர்ச்சி எதிர்பார்த்தது போலவே வளர்ச்சி கண்டு வருவது போன்ற காரணங்களால் வட்டி விகிதம் குறைக்கப்படலாம் என்ற எதிர்பார்ப்பு இருந்தது. எதிர்பார்த்தது போலவே குறுகிய கால கடன்களுக்கான ரெப்போ வட்டி விகிதம் 0.25 சதவீதம் குறைக்கப்பட்டுள்ளது. அதேப்போன்று ரிவர்ஸ் ரெப்போ வட்டி விகிதமும் 0.25 சதவீதம் குறைக்கப்பட்டுள்ளது. 

வட்டி விகிதம் குறையும் : ரிசர்வ் வங்கியின் இந்த அறிவிப்பால் வீடு மற்றும் வாகனங்களுக்கான குறுகியகால கடன்களுக்கான வட்டி விகிதம் குறைய வாய்ப்பு ஏற்பட்டு உள்ளது. 

* ரெப்போ வட்டி விகிதம் 6.50 சதவீதத்திலிருந்து 6.25 சதவீதமாக குறைப்பு

* ரிவர்ஸ் ரெப்போ வட்டி விகிதம் 6 சதவீதத்திலிருந்து 5.75 சதவீதமாக குறைப்பு

* சிஆர்ஆர் எனப்படும் ரொக்க கையிருப்பு விகிதத்தில் எந்த மாற்றமும் இல்லை, 4 சதவீதமே தொடரும்.

* நடப்பாண்டில் நாட்டின் வளர்ச்சி 7.6 சதவீதம் இருக்கும்.

* 2017, மார்ச்க்குள் சில்லரை வர்த்தக பணவீக்கம் 5 சதவீதமாக இருக்கும்.

* 2018-19-க்குள் நாட்டின் வளர்ச்சி 8 சதவீதத்தை எட்டும்