பதிவு செய்த நாள்
02 டிச2016
00:12
ஐதராபாத்: ‘‘இந்தியாவைச் சேர்ந்த, தகவல் தொழில்நுட்ப நிறுவனங்கள், அமெரிக்கா, பிரிட்டன் ஆகிய நாடுகளை மட்டும் நம்பியிராமல், சீனா, ஜப்பான் போன்ற சந்தைகளிலும் நுழைய வேண்டும்,’’ என, இன்போசிஸ் நிறுவனருள் ஒருவரான, கிரிஸ் கோபாலகிருஷ்ணன் தெரிவித்து உள்ளார்.
அவர், மேலும் கூறியதாவது:இந்தியாவில், ஐ.டி., எனப்படும் தகவல் தொழில்நுட்பத் துறை, ஆண்டுக்கு, 8 – 9 சதவீதம் வளர்ச்சி கண்டு வருகிறது. இது, 2 – 3 சதவீத சர்வதேச பொருளாதார வளர்ச்சியுடன் ஒப்பிடும் போது, மிகவும் அதிகம். எனினும், சில ஆண்டுகளுக்கு முன், ஐ.டி., துறை கண்ட வளர்ச்சி, தற்போது இல்லை; சற்று குறைந்துள்ளது.
இந்நிலையிலும், இந்தியாவில் வேகமான வளர்ச்சி கண்டு வரும் துறைகளில் ஒன்றாக, ஐ.டி., துறை விளங்குகிறது. அதே சமயம், ‘சர்வதேச அரசியல் நிலவரம், ஸ்திரமற்ற பொருளாதார சூழல், வங்கிகள், நிதி நிறுவனங்கள் ஆகியவை, ஐ.டி., செலவினங்களை குறைத்துள்ளது போன்றவற்றால், நடப்பு நிதியாண்டில், நாட்டின் சாப்ட்வேர் ஏற்றுமதி வளர்ச்சி, 8 – 10 சதவீத அளவிற்கே இருக்கும்’ என, ‘நாஸ்காம்’ மதிப்பிட்டு உள்ளது.
இத்தகைய சூழலில், இந்திய, ஐ.டி., துறை, அமெரிக்கா, பிரிட்டன் ஆகிய நாடுகளை முற்றிலும் சார்ந்திருக்காமல், புதிய தொழில்நுட்பங்கள் மூலம், பிற நாடுகளில் வலுவாக காலுான்ற முயற்சிக்க வேண்டும்.
குறிப்பாக, சீனா, ஜப்பான், ஆசிய பசிபிக் பிராந்தியம் மற்றும் ஒருசில ஐரோப்பிய நாடுகளில், வர்த்தகத்தை விரிவுபடுத்துவதற்கான வாய்ப்புகள் அதிகம் உள்ளன. அதற்கு, இந்திய, ஐ.டி., நிறுவனங்கள், புதிய தொழில்நட்ப சேவைகளை வழங்க வேண்டும். உதாரணமாக, செயற்கை நுண்ணறிவு சேவைகள், இணையம் சார்ந்த, ‘ரோபோ’ சாப்ட்வேர் உருவாக்கம், தகவல் அறிவியல் சேவைகள் உள்ளிட்ட, வேகமாக வளர்ச்சி கண்டு வரும் தொழில்நுட்பங்கள் மூலம், வெளிநாட்டு சந்தைகளில், இந்திய, ஐ.டி., நிறுவனங்கள் வலுவான அடித்தளத்தை அமைத்துக் கொள்ளலாம்.
சீனாவின், மிகப்பெரிய, ஐ.டி., சந்தையில், இந்திய நிறுவனங்கள் நுழைவது கடினம் என்ற போதிலும், ஒருசில சேவைகளுக்கு அங்கு தேவைப்பாடு உள்ளது. அவற்றில், இந்திய, ஐ.டி., நிறுவனங்கள் கவனம் செலுத்தலாம். அதற்கு, மிக அதிக முதலீடு தேவைப்படும். அது போல, ஜப்பான் சந்தையிலும், இந்திய, ஐ.டி., நிறுவனங்களுக்கு வர்த்தக வாய்ப்பு உள்ளது; அவற்றை பயன்படுத்திக் கொள்ளலாம். இவ்வாறு அவர் கூறினார்.
மேலும் பொது செய்திகள்
|
Advertisement
|
Advertisement
|
Advertisement
|
|
|
|