பதிவு செய்த நாள்
13 டிச2016
01:33
புதுடில்லி:‘நடுத்தர வருவாயினர் பெருகி வருவதாலும், சர்வதேச ‘பிராண்டு’ பொருட்கள் குறித்த விழிப்புணர்வும், பயன்பாடும் அதிகரித்துள்ளதாலும், இந்தியாவில் ஆடம்பர பொருட்களுக்கான சந்தை, 25 சதவீதம் வளர்ச்சி கண்டு, 1,850 கோடி டாலராக உயரும்’ என, சி.ஐ.ஐ., – கன்டர் ஐ.எம்.ஆர்.பி., ஆய்வறிக்கையில் தெரிவிக்கப்பட்டுள்ளது.
அதன் விபரம்:இன்றைய நடுத்தர வர்க்க இளைஞர்கள், பகட்டாக வாழ விரும்புகின்றனர். அவர்கள், ஆடம்பரமான, ‘பிராண்டு’ உடைகளை அணிவதிலும், விலை அதிகம் உள்ள பொருட்களை வாங்குவதிலும் ஆர்வம் காட்டுகின்றனர். அவர்களுக்கு, சர்வதேச பிராண்டு பொருட்கள் குறித்த அனைத்து தகவல்களும் இணையத்தில் கிடைக்கின்றன.
சிறிய நகரங்களிலும் இணைய பயன்பாடு வேகமாக பரவி வருவதால், உலகில் உள்ள மிகச் சிறந்த பிராண்டு பொருட்கள் குறித்த விழிப்புணர்வும் அதிகரித்துள்ளது. அதனால், இந்தியாவில் ஆடம்பர பொருட்களின் சந்தை, சிறப்பாக வளர்ச்சி கண்டு வருகிறது.கடந்த, 2015ல் இந்தியாவில் ஆடம்பர பொருட்கள் சந்தை மதிப்பு, 1,470 கோடி டாலராக இருந்தது. இது, இந்தாண்டு, 25 சதவீதம் வளர்ச்சி கண்டு, 1,850 கோடி டாலராக அதிகரிக்கும் என, மதிப்பிடப்பட்டுள்ளது.
இத்துறையின் வளர்ச்சிக்கு, மின்னணு சாதனங்கள், ஆடம்பர சுற்றுலா திட்டங்கள், தனிநபர் பராமரிப்பு பொருட்கள், ஆபரணங்கள், சொகுசு கார்கள், நட்சத்திர ஓட்டல் உணவகங்கள் உள்ளிட்டவையும், குறிப்பிடத்தக்க பங்களிப்பை வழங்கி வருகின்றன.
வருங்காலத்தில், வாசனை திரவியங்கள், வாட்சுகள், பிரத்யேக வடிவமைப்பு நகைகள், தோல் பராமரிப்பு பொருட்கள், ஆயத்த ஆடைகள் ஆகியவையும் முக்கிய பங்காற்றும்.ஆடம்பர பொருட்கள் மற்றும் சேவைகள் சந்தையில், டில்லி, பஞ்சாப், ஹரியானா ஆகிய மாநிலங்களை உள்ளடக்கிய வட மாநிலங்கள், 40 சதவீத பங்களிப்பை கொண்டுள்ளன.தமிழகம், கேரளா, ஆந்திரா, கர்நாடகா ஆகிய மாநிலங்களை உள்ளடக்கிய தென்னிந்தியா மற்றும் மேற்கு இந்தியாவின் பங்களிப்பு, தலா 25 சதவீதமாக உள்ளது; கிழக்கு பிராந்தியம், 10 சதவீத பங்களிப்பை வழங்குகிறது.
ஆடம்பர பொருட்கள் சந்தை வளர்ச்சிக்கு, வேகமாக பரவி வரும் மின்னணு வணிகமும் துணை புரிகிறது. இரண்டு மற்றும் மூன்றாம் நிலை நகரங்களில், ஆடம்பர பொருட்களுக்கான தேவை, மெல்ல அதிகரித்து வருகிறது.வெளிநாடுகளில் இருந்து இறக்குமதியாகும், ஆடம்பர பொருட்களுக்கு, 30 – 40 சதவீத வரி விதிக்கப்படுகிறது. இதனால், வெளிநாடுகளை ஒப்பிடும் போது, உள்நாட்டில் ஆடம்பர பொருட்களின் விலை, சராசரியாக, 20 சதவீதம் அதிகமாக உள்ளது.இவ்வாறு அதில் கூறப்பட்டுள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|