பதிவு செய்த நாள்
09 ஜூலை2017
06:18
விற்பனை மற்றும் சேவையை, ஒரே விலைப் பட்டியலில் குறிப்பிடலாமா?– மணிகண்டன், போரூர்
ஜி.எஸ்.டி., அமைப்பில், சேவை மற்றும் விற்பனை என்ற பாகுபாடு கிடையாது. இவற்றை, ‘வழங்கல்’ என்ற பொருளால் குறிப்பிடுகிறோம். எனவே, ஒரே விலைப் பட்டியலில் சேவை மற்றும் விற்பனையை, வழங்கல் எனக் குறிப்பிட்டு, விலைப் பட்டியலை எழுப்பலாம்.
தற்போது நான், ‘கிரெடிட் கார்டு’ உபயோகித்து வருகிறேன். கிரெடிட் கார்டு மூலம் வாங்கிய பொருட்களுக்கு, குறித்த தவணை தினத்தில் தொகையை செலுத்தி விடுகிறேன். இனி, கிரெடிட் கார்டு தொகைக்கும், 18 சதவீதம், ஜி.எஸ்.டி., வரும் என, குறுஞ்செய்தி மூலமாகவும், ‘வாட்ஸ் அப்’ மூலமாகவும் நிறைய தகவல்கள் வருகின்றன. இதை பற்றி, தயவுகூர்ந்து விளக்கவும்.
– இந்துமதி, தேனி
இது, முற்றிலும் தவறான கருத்து. நீங்கள் செலுத்தும், கிரெடிட் கார்டு தொகைக்கு, ஜி.எஸ்.டி., விதிக்கப்படமாட்டாது. தவணை தினத்தில் தொகையை செலுத்த தவறினால், நீங்கள் செலுத்த வேண்டிய வட்டித் தொகை அல்லது அபராதத் தொகைக்கு மட்டுமே, ஜி.எஸ்.டி., விதிக்கப்படும்.
தற்போது, எங்களுக்கு கலால் மற்றும் ‘வாட்’ வரியின் உள்ளீட்டு பயன் உள்ளது. இவை, ஜி.எஸ்.டி., சட்டத்தில் எத்தகைய உள்ளீட்டு பயனாக அமையும்?– கவிதா, தஞ்சாவூர்
தற்போதுள்ள, கலால் வரி மற்றும் சேவை வரியின் உள்ளீட்டு வரி பயன், சி.ஜி.எஸ்.டி.,யாகவும், மாநில, ‘வாட்’ வரியின் உள்ளீட்டு வரி பயன், எஸ்.ஜி.எஸ்.டி.,யாகவும், ஜி.எஸ்.டி., அமைப்பில் கிடைக்கும்.
நான், நகைக் கடை வைத்துள்ளேன். சில நேரங்களில், வாடிக்கையாளர்கள் பழைய நகைகளை கொடுத்து, அதற்கு நிகராக பணமோ அல்லது புதிய நகைகளையோ பெற்றுச் செல்வர். இத்தகைய பரிவர்த்தனைக்கு, நான், ‘ரிவெர்ஸ் சார்ஜ்’ முறையில் வரி செலுத்த வேண்டுமா?– பாலாஜி, சேலம்
இத்தகைய பரிவர்த்தனை, சாமானிய மக்களால் செய்யப்படும் பரிவர்த்தனையாகும். இது, ஒரு வியாபார நிமித்தமான பரிவர்த்தனையாக கருதப்படாது. எனவே, இதில், ‘ரிவெர்ஸ் சார்ஜ்’ முறை கிடையாது.
நாங்கள், சென்னையிலிருந்து மும்பைக்கு சென்று, அங்கே சில பேப்ரிகேஷன் வேலைகள் செய்து, இயந்திரங்களை நிறுவி வருகிறோம். இத்தகைய செயலுக்கு எத்தனை சதவீதம், ஜி.எஸ்.டி., வசூல் செய்ய வேண்டும்?– முகேஷ், சென்னை
இதற்கு நீங்கள், 18 சதவீதம் ஒருங்கிணைந்த, ஜி.எஸ்.டி., வசூல் செய்ய வேண்டும்.
நான், சேவை வரியை வாடிக்கையாளரிடமிருந்து பணம் வசூல் செய்த பின் தான் செலுத்தி வந்தேன். தற்போது, ஜி.எஸ்.டி.,யில் பணம் வசூல் செய்யவில்லை என்றாலும் செலுத்த வேண்டும் என்கின்றனர். இது குறித்து விளக்கவும்.– மெர்சி டிரடேர்ஸ், கோவை
ஜி.எஸ்.டி.,யை, வழங்கல் நடந்த, அடுத்த மாதம், 20க்குள் செலுத்த வேண்டும். வாடிக்கையாளரிடமிருந்து பணம் பெறாவிட்டாலும், குவிப்பு அடிப்படையில் செலுத்த வேண்டும்.
தனிநபர், ஜி.எஸ்.டி., கட்டி வாங்கும் பொருட்களுக்கு, வருமான வரிச்சலுகை உண்டா?– சித்தார்த், வேலுார்
வருமான வரி என்பது, ஒரு நேரடி வரி விதிப்பாகும். ஜி.எஸ்.டி., என்பது, மறைமுக வரியாகும். இவை இரண்டும், இரு வேறு சட்டங்களால் ஆளப்படுகின்றன. தனிநபர் தன் நுகர்விற்காக, ஜி.எஸ்.டி., செலுத்திய தொகையை, வருமான வரி செலுத்தும் போது, உள்ளீட்டு சலுகையாக பெற இயலாது.
ஜி.சேகர், எப்.சி.ஏ., ஆடிட்டர்
மேலும் பொது செய்திகள்
|
Advertisement
|
Advertisement
|
Advertisement
|
|
|
|