பதிவு செய்த நாள்
03 ஆக2017
00:03
புதுடில்லி : கடந்த ஜூலையில், உள்நாட்டு வாகன விற்பனையில், முன்னணி நிறுவனங்கள், இரட்டை இலக்க வளர்ச்சியை கண்டுள்ளன. இதற்கு, நிறுவனங்களின் விலை குறைப்பு, அமலுக்கு வந்துள்ள, ஜி.எஸ்.டி., ஆகியவை துணை புரிந்துள்ளன.
ஜி.எஸ்.டி., எனப்படும், சரக்கு மற்றும் சேவை வரி அமலுக்கு வரும் முன், முகவர்களிடம் தேங்கியுள்ள வாகனங்களை விரைந்து விற்பனை செய்வதற்காக, பல நிறுவனங்கள், 5,000 ரூபாய் – 7 லட்சம் ரூபாய் வரை, விலையை குறைத்தன. அதனால், வாகனங்கள் விற்பனை அதிகரித்தது. அதே சமயம், நிறுவனங்களிடம் இருந்து வாகனங்களை கொள்முதல் செய்வதை, முகவர்கள் தள்ளி வைத்தனர்.
இந்நிலையில், ஜூலையில், ஜி.எஸ்.டி., அமலுக்கு வந்ததை தொடர்ந்து, முகவர்கள் மீண்டும் சுறுசுறுப்பாக வாகனங்களை கொள்முதல் செய்ய துவங்கி உள்ளனர். வாகன தயாரிப்பு நிறுவனங்களும், ஜி.எஸ்.டி.,யால் பெற்ற வரி பயனை, நுகர்வோருக்கு அளித்துள்ளன. இதனால், ஜூலையில், வாகன தயாரிப்பு நிறுவனங்களின் விற்பனை அமோகமாக இருந்தது.
அதன் விபரம்:
மாருதி சுசூகி இந்தியா: ஜூலையில், இதன் உள்நாட்டு வாகன விற்பனை, 22.4 சதவீதம் உயர்ந்து, 1.54 லட்சமாக அதிகரித்து உள்ளது. இது, கடந்த ஆண்டு இதே மாதத்தில், 1.26 லட்சமாக இருந்தது.
டாடா மோட்டார்ஸ்: இந்நிறுவனத்தின் உள்நாட்டு பயணியர் வாகன விற்பனை, 10.23 சதவீதம் வளர்ச்சி கண்டு, 13,547 லிருந்து, 14,933 ஆக உயர்ந்துள்ளது.
போர்டு இந்தியா: இதன் உள்நாட்டு வாகன விற்பனை, 18.96 சதவீதம் அதிகரித்து, 7,076லிருந்து, 8,418 ஆக உயர்ந்து உள்ளது.
ஹூண்டாய் மோட்டார் இந்தியா: ஜூலையில், இந்நிறுவனத்தின் உள்நாட்டு வாகன விற்பனை, 43,007 ஆக உயர்ந்துள்ளது. இது, கடந்த ஆண்டு இதே மாதத்தில், 41,201 ஆக இருந்தது.
மகிந்திரா அண்டு மகிந்திரா: இந்நிறுவனத்தின் பயணியர் வாகன விற்பனை, 13 சதவீதம் வளர்ச்சி கண்டு, 35,305லிருந்து, 39,762 ஆக உயர்ந்துள்ளது.
ஹோண்டா கார்ஸ் இந்தியா: இதன் கார் விற்பனை, ஜூலையில், 21.74 சதவீதம் உயர்ந்து, 17,085 ஆக அதிகரித்துள்ளது. இது, கடந்த ஆண்டு இதே காலத்தில், 14,033 ஆக இருந்தது.
அசோக் லேலாண்டு: இதன் மொத்த வாகன விற்பனை, 14.19 சதவீதம் அதிகரித்து, 10,492லிருந்து, 11,981 ஆக உயர்ந்துள்ளது. இந்தாண்டு பருவமழை நன்கு இருக்கும் என்ற கணிப்பும், எதிர் வரும் பண்டிகை காலமும், வாகன விற்பனையை மேலும் அதிகரிக்க துணை புரியும் என, எதிர்பார்க்கப்படுகிறது.
இருசக்கர வாகனம்
ஹீரோ மோட்டோகார்ப்:இந்நிறுவனத்தின் இருசக்கர வாகன விற்பனை, ஜூலையில் 17.13 சதவீதம் அதிகரித்து, 5,32,113லிருந்து, 6,23,269 ஆக வளர்ச்சி கண்டுள்ளது.
ஹோண்டா மோட்டார் சைக்கிள் அண்டு ஸ்கூட்டர் இந்தியா :இதன் இருசக்கர வாகன விற்பனை, 19.96 சதவீதம் ஏற்றம் கண்டு, 4,53,884லிருந்து, 5,44,508 ஆக உயர்ந்துள்ளது
ராயல் என்பீல்டு:இதன் விற்பனை, 20.75 சதவீதம் உயர்ந்து, 53,378லிருந்து, 64,459 ஆக அதிகரித்துள்ளது.
டி.வி.எஸ்., மோட்டார் கம்பெனி:இந்நிறுவனத்தின் இருசக்கர வாகன விற்பனை, 9.34 சதவீதம் உயர்ந்து, 2,48,002லிருந்து, 2,71,171 ஆக அதிகரித்துள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|