பதிவு செய்த நாள்
10 ஆக2017
23:59
* நான், பட்டய கணக்காளராக உள்ளேன். ஜி.எஸ்.டி., வருவதற்கு முன் வழங்கிய விலைப் பட்டியலில், சேவை வரி விதித்திருந்தோம். அதற்கான தொகை தற்போது தான் வந்துள்ளது. இப்போது வசூலித்த தொகையை, ஜி.எஸ்.டி.,யாக செலுத்த வேண்டுமா அல்லது சேவை வரியாக செலுத்த வேண்டுமா?– முரளிதரன், சென்னை
சேவை வரியாக, நீங்கள் வசூலித்த தொகையை, சேவை வரியாக தான் செலுத்த வேண்டும். அதற்கு, ஜி.எஸ்.டி., விதிக்கப்பட மாட்டாது.
* சார், காம்போசிட் வழங்கல் என்றால் என்ன? இதை விபரமாக விளக்கவும்.– வெங்கடாச்சலம், பரங்கிமலை
பதிவு செய்யப்பட்ட நபரால், இரண்டோ அல்லது அதற்கு மேற்பட்ட வரி விதிக்கக்கூடிய சரக்கை அல்லது சேவையை வழங்கும் போது, அதில் ஒன்றை முதன்மை வழங்கலாகக் கொண்டு, மற்றொன்றை இணைத்து அல்லது அதை சார்ந்து வழங்கும் வழங்கல், கூட்டு வழங்கல் (காம்போசிட் வழங்கல்) என, கூறப்படுகிறது.உதாரணமாக, சரக்குகளை விற்பனை செய்து அனுப்பும் போது, போக்குவரத்து மற்றும் காப்பீட்டு தொகை போன்ற சேவைகளும் சேர்ந்து வழங்கும் வழங்கலானது, கூட்டு வழங்கலாகும். இந்த பரிவர்த்தனையில், சரக்குகளின் வழங்கல் முதன்மை வழங்கலாகவும், அதை சார்ந்த இதர சேவைகள், இணைப்பு வழங்கலாகவும் கருதப்படும்.
* சார், நான், ஜி.எஸ்.டி., பதிவு செய்துவிட்டேன். என் வணிக கட்டடத்தை வாடகைக்கு விட்டுள்ளேன். அதில், 9 வணிகர்கள் கடை நடத்தி வருகின்றனர். இவர்கள் யாரும், ஜி.எஸ்.டி., பதிவு பெறவில்லை. ஏனெனில் அவர்களது மொத்த வருமானம், 20 லட்சம் ரூபாய்க்கும் குறைவாக உள்ளது. பதிவு செய்யாத வணிகர்களிடமிருந்தும், ஜி.எஸ்.டி., வசூல் செய்ய வேண்டுமா?– மீனா ரகு, நங்கநல்லுார்
வணிக கட்டடத்தை வாடகைக்கு விடும் போது அதற்கு, ஜி.எஸ்.டி., விதிக்கப்படும். தங்களுடைய வாடகைதாரர்களின், ஜி.எஸ்.டி., பதிவை கருத்தில் கொள்ள தேவையில்லை. அவர்கள் பதிவு செய்யாவிட்டாலும், நீங்கள், ஜி.எஸ்.டி., வசூலித்து அரசுக்கு செலுத்த வேண்டும்.
* நாங்கள், ஏற்கனவே, ‘வாட்’ பதிவு செய்திருந்தோம். அதனால், ‘மைக்ரேஷன்’ முறையில், ஜி.எஸ்.டி., தற்காலிக பதிவும் செய்துவிட்டோம். இந்த பதிவை ரத்து செய்ய தவணை தேதி உள்ளதா?– ஜான், நெல்லை
ஆம். நீங்கள் பெற்ற தற்காலிக பதிவை ரத்து செய்வதற்கான தவணைக் கெடு, தற்போது நீட்டிக்கப்பட்டு உள்ளது. நீங்கள், செப்., 30க்குள் பதிவை ரத்து செய்வதற்காக விண்ணப்பிக்கலாம்.
* சார், நாங்கள், திருவண்ணாமலையில் அறக்கட்டளை நடத்தி வருகிறோம். அதில், இலவசமாக உணவளித்து வருகிறோம். இதற்கு, ஜி.எஸ்.டி., ‘ரிவெர்ஸ் சார்ஜ்’ முறையில் செலுத்த வேண்டும் என, கூறுகின்றனர். தங்களின் ஆலோசனைக்காக காத்திருக்கிறோம்.– சதாசிவம், திருவண்ணாமலை
உங்களுடைய சேவைக்கு, என் மனமார்ந்த பாராட்டுகள். நீங்கள் மேற்கூறிய பரிவர்த்தனைக்கு, ஜி.எஸ்.டி., விதிக்கப்பட மாட்டாது. மேலும், நீங்கள், ‘ரிவெர்ஸ் சார்ஜ்’ முறையில் வரி செலுத்த தேவையில்லை.
* தற்போது, ஜூன் மாதத்திற்குரிய சேவை வரிக்கான, ‘ரிட்டர்ன்’ தாக்கல் செய்ய முடியுமா?– பிரசன்னா, கும்பகோணம்
2017 ஏப்., – ஜூன் வரை அளித்த சேவைக்கு, சேவை வரி தாக்கல், எஸ்.டி., 3 படிவத்தில், 15ம் தேதிக்குள் தாக்கல் செய்ய வேண்டும்.
-ஜி.சேகர், எப்.சி.ஏ., ஆடிட்டர்
மேலும் பொது செய்திகள்
|
Advertisement
|
Advertisement
|
Advertisement
|
|
|
|