பதிவு செய்த நாள்
17 ஆக2017
08:38
சார், நாங்கள், கலை மற்றும் ஓவிய துறையில், மாணவர்களை தயார் செய்து வருகிறோம். இதற்கென, பயிற்சி வகுப்புகள் நடத்தி வருகிறோம். மாணவர்களிடமிருந்து, மாதம், 750 ரூபாய் – 1,000 ரூபாய் வரை, பயிற்சி கட்டணமாக பெறுகிறோம். நாங்கள், ஜி.எஸ்.டி., பதிவு செய்ய வேண்டுமா? இதற்கு, தனி சலுகை ஏதேனும் உள்ளதா?– ரவிராஜ், கோவைவருமான வரித்துறையிடமிருந்து விலக்கு பெற்ற நபர்கள் (உதாரணமாக தொண்டு நிறுவனம்) இந்த சேவையில் ஈடுபட்டால், ஜி.எஸ்.டி.,யிலிருந்து விலக்கு அளித்துள்ளனர். வேறு நபர்கள், இந்த சேவையை வழங்கினால் அதற்கு, 18 சதவீதம், ஜி.எஸ்.டி., வசூல் செய்ய வேண்டும். பதிவு செய்யப்பட்ட நபர் மட்டுமே, வரியை வசூலிக்க முடியும்.
நாங்கள், விவசாய உற்பத்தி பொருட்களை, சரக்கு போக்குவரத்துக்கு, லாரிகள் மூலம், எங்கள் தொழிற்சாலைக்கு கொண்டு வருகிறோம். நாங்கள் செலுத்தும் லாரி வாடகைக்கு, ‘ரிவெர்ஸ் சார்ஜ்’ முறையில் வரி செலுத்த வேண்டுமா?– பிர்லா, விருதுநகர்பொதுவாக, பதிவு செய்த நபர், சரக்கு போக்குவரத்திற்காக செலுத்தும் வாடகையில், ‘ரிவெர்ஸ் சார்ஜ்’ முறையில் வரி செலுத்த வேண்டும். ஆனால், நீங்கள் விவசாய உற்பத்தி பொருட்களை கொண்டு வருவதால், அதற்கு, ஜி.எஸ்.டி.,யிலிருந்து விலக்கு அளித்துள்ளனர். எனவே நீங்கள், ‘ரிவெர்ஸ் சார்ஜ்’ முறையில் வரி செலுத்த வேண்டாம்.
நாங்கள், தங்கும் விடுதி ஒன்றை வைத்துள்ளோம். ஒரு நாள் வாடகை, 750 ரூபாய் – 900 ரூபாய். நாங்கள், ஜி.எஸ்.டி., பதிவு செய்ய வேண்டுமா? இதற்கு ஏதாவது சலுகை உள்ளதா?– பழனிசாமி, வால்பாறைஉங்களுடைய தங்கும் விடுதியின் வாடகை தொகை, ஒரு நாளைக்கு, 1,000 ரூபாய்க்கு குறைவாக இருந்தால், அதற்கு, ஜி.எஸ்.டி., விதிக்க தேவையில்லை. உங்கள் வாடகை தொகை, 1,000 ரூபாய்க்கு குறைவாக உள்ள காரணத்தால், நீங்கள், ஜி.எஸ்.டி., பதிவு செய்ய தேவையில்லை.
சார், நாங்கள், உணவகம் வைத்துள்ளோம். அதில், குளிர்சாதன வசதியும் உள்ளது; குளிர்சாதன வசதி இல்லாத கூடமும் உள்ளது. நாங்கள், பார்சல் மூலம் உணவுகளை வாடிக்கையாளர்களுக்கு விற்பனை செய்கிறோம். நாங்கள், எவ்வளவு சதவீதம் வரி வசூல் செய்ய வேண்டும்?– சந்தான கோபாலன், புரசைவாக்கம்இது, சற்று சர்ச்சைக்குரிய கேள்வி. நாங்களும், அரசிடமிருந்து ஒரு தெளிவான சுற்றறிக்கையை எதிர்பார்த்து கொண்டிருக்கிறோம். தற்போது உள்ள, ஜி.எஸ்.டி., சட்ட விதிகளின்படி, உங்கள் உணவகத்தில், ஏதாவது ஒரு பகுதியில் குளிர்சாதன வசதி இருந்தாலும் கூட, நீங்கள், 18 சதவீதம், ஜி.எஸ்.டி., வசூல் செய்ய வேண்டும். இது, நீங்கள் விற்பனை செய்யக் கூடிய பார்சல் விற்பனைக்கும் பொருந்தும். குளிர்சாதன வசதி இல்லாத உணவகங்களில், 12 சதவீதம் வரி வசூல் செய்ய வேண்டும்.
சார், நாங்கள், குளிர்சாதன இயந்திரங்களை பழுது பார்த்தல், பொருத்துதல் ஆகிய சேவையில் ஈடுபட்டு உள்ளோம். எங்களுக்கும் பதிவு செய்ய உச்ச வரம்பான, 20 லட்சம் ரூபாய் என்பது பொருந்துமா?– பார்கவ், சென்னைவணிகத்தில் ஈடுபட்டுள்ள அனைத்து நபர்களுக்கும், பதிவு செய்வதற்கான ஆண்டு உச்ச வரம்பான, 20 லட்சம் ரூபாய் என்பது பொருந்தும். உங்கள் ஆண்டு வருமானம், 20 லட்சம் ரூபாயை தாண்டும் போது, ஜி.எஸ்.டி., பதிவெண் பெற வேண்டும்.
சார், நான், ரியல் எஸ்டேட் துறையில் முகவராக உள்ளேன். அதற்கென தனி நிறுவனம் நடத்தி வருகிறேன். ரியல் எஸ்டேட் துறையில் உள்ள வர்த்தகத்திற்கு, எத்தனை சதவீதம் வரி விதிக்க வேண்டும்?– அன்புமணி, சென்னைநீங்கள், ஜி.எஸ்.டி., பதிவு பெற்ற விபரத்தை குறிப்பிடவில்லை. நீங்கள் பதிவு செய்துள்ள நபர் என்றால், ரியல் எஸ்டேட் துறையில் வழங்கும் சேவைக்கு, 18 சதவீதம் வரி வசூல் செய்ய வேண்டும்.
-ஜி.சேகர், எப்.சி.ஏ., ஆடிட்டர்
மேலும் பொது செய்திகள்
|
Advertisement
|
Advertisement
|
Advertisement
|
|
|
|