பதிவு செய்த நாள்
30 ஜூன்2012
04:26
மும்பை:நாட்டின் பங்கு வியாபாரம் வாரத்தின் கடைசி வர்த்தக தினமான வெள்ளிக்கிழமையன்று மிகவும் சிறப்பாக இருந்தது. ஐரோப்பா மற்றும் இதர ஆசியபங்குச் சந்தைகளிலும் பங்கு வியாபாரம் சூடுபிடித்து காணப்பட்டது.ஐரோப்பிய கூட்டமைப்பு நாடுகளின் தலைவர்கள், கடன் பிரச்னையில் சிக்கியுள்ள ஐரோப்பிய நாடுகளுக்கு முழு அளவில், உதவி புரிய முடிவு செய்துள்ளனர் என்ற அறிவிப்பு வெளியானது.
இதையடுத்து ஐரோப்பிய பங்குச் சந்தைகளில் வர்த்தகம் 2 சதவீத அளவிற்கும், அமெரிக்கா மற்றும் ஆசியப் பங்குச் சந்தைகளில், 1 சதவீத அளவிற்கும் வர்த்தகம் அதிகரித்திருந்தது.ஒட்டு மொத்த அளவில், உலகின் பல்வேறு நாடுகளின் சாதகமான சூழலால், இந்திய பங்குச் சந்தைகளிலும், காலையில் வர்த்தகம் துவங்கியது முதல், முடிவடையும் வரை, பல துறைகளைச் சேர்ந்த நிறுவனப் பங்குகள் அதிக விலைக்கு கைமாறின.அன்னிய முதலீடு:நேற்று நடைபெற்ற பங்கு வியாபாரத்தில், வங்கி, உலோகம், நுகர்வோர் சாதனங்கள், பொறியியல் உள்ளிட்ட பல துறைகளைச் சேர்ந்த நிறுவனப் பங்குகளுக்கு தேவை அதிகரித்து காணப்பட்டது.
பங்கு வர்த்தகம் நன்கு இருந்ததையடுத்து, அன்னிய நிதி நிறுவனங்கள் நேற்று 3,047 கோடி ரூபாயை (உத்தேச மதிப்பீடு), முதலீடு செய்தன. இதுவும், பங்கு வர்த்தகத்திற்கு வலுச் சேர்ப்பதாக இருந்தது.
ரூபாய் மதிப்பு:கடந்த ஒரு சில மாதங்களாக, தொடர்ந்து சரிவடைந்து வந்த டாலருக்கு எதிரான ரூபாயின் வெளிமதிப்பு, நேற்று சற்று அதிகரித்து காணப்பட்டது. வர்த்தகம் முடியும் போது, ரூபாயின் மதிப்பு 1.17 ரூபாய் உயர்ந்து,
55.64ல் நிலைகொண்டது.மும்பை பங்குச் சந்தையின் குறியீட்டு எண், வர்த்தகம் முடியும்போது, 439.22 புள்ளிகள் அதிகரித்து, 17,429.98 புள்ளிகளில் நிலைகொண்டது. வர்த்தகத்தின் இடையே, இப்பங்குச் சந்தையின் குறியீட்டு எண் அதிகபட்சமாக, 17,448.48 புள்ளிகள் வரையிலும், குறைந்தபட்சமாக 17,134.61 புள்ளிகள் வரையிலும் சென்றது.
"சென்செக்ஸ்' கணக்கிட உதவும் 30 நிறுவனங்களுள், கோல் இந்தியா நிறுவனத்தை தவிர, ஏனைய 29 நிறுவனப் பங்குகளின் விலையும் அதிகரித்து காணப்பட்டது.தேசிய பங்குச் சந்தையின் குறியீட்டு எண், "நிப்டி' 129.75 புள்ளிகள் உயர்ந்து, 5,278.90 புள்ளிகளில் நிலைபெற்றது. வர்த்தகத்தின் இடையே அதிகபட்சமாக 5,286.25 புள்ளிகள் வரையிலும், குறைந்தபட்சமாக 5,189 புள்ளிகள் வரையிலும் சென்றது.
மேலும் பங்கு வர்த்தகம் செய்திகள்
|
Advertisement
|
Advertisement
|
Advertisement
|
|
|
|