பதிவு செய்த நாள்
13 மார்2016
07:54
புதுடில்லி : ‘ஒடிசா அரசுக்கு, நிலுவையில் உள்ள நுழைவு வரி முழுவதையும் செலுத்த வேண்டும்’ என, பொது துறையைச் சேர்ந்த நால்கோ நிறுவனத்திற்கு, சுப்ரீம் கோர்ட் உத்தரவிட்டுள்ளது.
அத்துடன் நுழைவு வரி வசூலிக்க விதிக்கப்பட்ட தடையும் நீக்கப்பட்டுள்ளது. இதனால், ஒடிசா அரசுக்கு, பல ஆயிரம் கோடி வரி நிலுவை வசூலாகும் என, எதிர்பார்க்கப்படுகிறது. ஒடிசா அரசு, இறக்குமதி செய்யப்படும் பொருட்களின் விற்பனைக்கு, 12 சதவீதம் வரை, நுழைவு வரி விதித்துள்ளது. ‘இது, மாநிலங்களுக்கு இடையிலான பொருட்களின் பரிவர்த்தனைக்கு தான் பொருந்துமே தவிர, இறக்குமதியாகும் பொருட்களுக்கு பொருந்தாது’ என, ஒடிசா அரசுக்கு எதிராக, 25க்கும் மேற்பட்ட நிறுவனங்கள் சுப்ரீம் கோர்ட்டில் முறையிட்டன. அதை ஏற்று, 2014ல், நுழைவு வரி வசூலிக்க தடை விதித்த சுப்ரீம் கோர்ட், வழக்கு முடியும் வரை, நிறுவனங்கள், 50 சதவீத வரியை, ஒடிசா அரசிடம், ‘டிபாசிட்’ செய்து வர வேண்டும் என, உத்தரவிட்டது. இந்நிலையில், ஒடிசா அரசு, நிலுவையில் உள்ள நுழைவு வரியை, அபராதத்துடன் வசூலிப்பதற்கான நடவடிக்கையில் இறங்கியது. இதற்கு தடை விதிக்கக் கோரி, நால்கோ நிறுவனம், சுப்ரீம் கோர்ட்டில் மேல்முறையீடு செய்தது.
இந்த மனு விசாரணையின் போது, தலைமை நீதிபதி டி.எஸ்.தாக்குர் தலைமையிலான அமர்வு கூறியதாவது:ஒடிசா போன்ற பின்தங்கிய மாநிலங்கள், அடிப்படை கட்டமைப்பு வசதிகளுக்கு போதிய நிதி இல்லாமல் அவதிப்படுகின்றன. இந்த வரிபணத்தின் மூலம், ஒடிசா பயன் பெறாமல் உள்ளது. இதை, சுப்ரீம் கோர்ட் வேடிக்கை பார்த்துக் கொண்டிருக்க முடியாது. நால்கோ நிறுவனம், நுழைவு வரி நிலுவையை முழுவதுமாக செலுத்த வேண்டும். அதேசமயம், அபராதம் ரத்து செய்யப்படுகிறது. மேலும், நுழைவு வரிக்கு விதிக்கப்பட்ட தடையும் நீக்கப்படுகிறது. மனு தாக்கல் செய்துள்ள, இதர நிறுவனங்கள், எவ்வளவு வரி பாக்கி வைத்துள்ளன என்ற விவரத்தை, ஒடிசா அரசு வழக்கறிஞர் தெரிவிக்க வேண்டும். அவ்வாறு தெரிவிக்கவில்லையென்றால், ஏப்., 13ம் தேதி ஒடிசா வணிக வரி ஆணையர் நேரில் ஆஜராக வேண்டும். இவ்வாறு நீதிபதிகள் தெரிவித்தனர்.
பல ஆயிரம் கோடி வரும்சுப்ரீம் கோர்ட் உத்தரவால், நால்கோ, வேதாந்தா அலுமினியம், டாடா ஸ்டீல், எஸ்ஸார் ஸ்டீல் உட்பட, 25க்கும் மேற்பட்ட நிறுவனங்கள், நிலுவை வைத்துள்ள, பல ஆயிரம் கோடி ரூபாய் நுழைவு வரியை செலுத்தும் நிலை ஏற்பட்டுள்ளது.
மேலும் பொது செய்திகள்
|
Advertisement
|
Advertisement
|
Advertisement
|
|
|
|