பதிவு செய்த நாள்
31 அக்2016
23:30
புதுடில்லி : வலைதளங்களில், ஊசி முதல் உணவு வரை, எண்ணற்ற பொருட்கள் விற்பனை செய்யப்பட்டாலும், விரைவில் உருகும், ‘ஐஸ் கிரீம்’ விற்பனையை மட்டும் மேற்கொள்ள முடியாத நிலை இருந்து வந்தது. தற்போது, வலைதளத்திலும், ஐஸ் கிரீம் விற்பனையை, பல நிறுவனங்கள் மேற்கொள்ள துவங்கியுள்ளன.
பல நிறுவனங்கள் :மதர் டெய்ரி, கிரீம் பெல், ஹவ்மோர் ஆகிய நிறுவனங்கள், நவீன தொழில்நுட்பத்தில், விரைவில் உருகாத, ஐஸ் கிரீம் வகைகளை, வலைதளங்களில் விற்பனை செய்கின்றன. வலைதளம் வாயிலாக, வீட்டு பொருட்களை விற்பனை செய்யும் பிக் பேஸ்கட், கிராபர்ஸ் நிறுவனங்களும், தற்போது ஐஸ் கிரீம் விற்பனையை துவக்கியுள்ளன. இவை போல, மேலும் பல நிறுவனங்கள், ஐஸ் கிரீம் விற்பனையில் களமிறங்கும் என, எதிர்பார்க்கப்படுகிறது.
இந்தியாவில், கிரீம் பெல் நிறுவனம், கூர்கான், நொய்டா, மொகாலி ஆகிய நகரங்களில், தொலைபேசியில், ‘ஆர்டர்’ செய்தால், வீடு தேடி வந்து ஐஸ் கிரீம் வழங்குகிறது. இந்நிறுவனம், இந்திய ஐஸ் கிரீம் சந்தையில், ஐந்தாவது இடத்தில் உள்ளது. மதர் டெய்ரி நிறுவனம், இன்னர் செப், பிக் பேஸ்கட், குரோபர்ஸ் ஆகிய வலைதள நிறுவனங்கள் மூலம், மும்பை மற்றும் டில்லியில், ஐஸ் கிரீம் விற்பனையில் ஈடுபட்டு வருகிறது.ஹவ்மோர் நிறுவனம், ஆமதாபாத், மும்பை, டில்லி ஆகிய நகரங்களில், வலைதளம் வாயிலான, ஐஸ் கிரீம் விற்பனையை துவக்கியுள்ளது.
சிறப்பு உறைகள்வழக்கமாக, ஐஸ் கிரீம் வகைகள், காற்று பட்டதும் கரைந்து விடும்; அவ்வாறு கரையாமலிருக்க, சிறப்பு உறைகளில், ஐஸ் கிரீம்கள் அடைக்கப்பட்டு விற்கப்படுகின்றன. இந்த உறைகள், ஐஸ் கிரீம் வகைகளை, குறைந்தபட்சம், 40 நிமிடங்கள் வரை கரையாமல் பாதுகாக்கும் தன்மை கொண்டவை. இதன் மூலம், வலைதளங்களில், ‘ஆர்டர்’ கொடுக்கும் வாடிக்கையாளர்களுக்கு, எளிதில் கரையாத, சுவை மிகுந்த ஐஸ் கிரீம் வகைகளை, நிறுவனங்கள் விற்பனை செய்கின்றன.
மேலும் பொது செய்திகள்
|
Advertisement
|
Advertisement
|
Advertisement
|
|
|
|