பதிவு செய்த நாள்
12 ஆக2017
00:49
புதுடில்லி:‘‘தொழில்நுட்ப மாற்றங்களை ஏற்க தவறும், எந்த நிறுவனமும் சிக்கலை சந்திக்க நேரும். இன்றைய இளைஞர்களின் தேவைகளை பூர்த்தி செய்யக் கூடிய வாகனங்களை தயாரிக்க வேண்டிய அவசியம் உள்ளது,’’ என, மாருதி சுசூகி இந்தியா நிறுவனத்தின் நிர்வாக இயக்குனரும், தலைமை செயல் அதிகாரியுமான, கெனிச்சி அயுகவா தெரிவித்து உள்ளார்.
அவர், நிறுவனத்தின் பங்கு முதலீட்டாளர்கள் கூட்டத்தில் பேசியதாவது:கடந்த நிதியாண்டு, நமக்கு மாறுபட்ட அனுபவங்களை தந்தது. போட்டி மிகுந்த வர்த்தகச் சூழலில், நமக்கு சப்ளை செய்யும் இரு நிறுவனங்களில், தீ விபத்து ஏற்பட்டது. மேலும், 2,000 ‘சிசி’ இன்ஜின் திறனுக்கு மேற்பட்ட டீசல் கார்களை பதிவு செய்யவும், பி.எஸ்., – 3 கார்களை விற்கவும், சுப்ரீம் கோர்ட் தடை விதித்தது.கார் தயாரிப்பில், இத்தகைய குறுகிய கால பிரச்னைகள், நமக்கு மிகப்பெரிய சவாலாக இருந்தன. இது போன்ற, எதிர்பாராத பிரச்னைகளை சமாளிக்க, நிறுவனத்தை மேலும் வலிமையாக்க வேண்டும் என்பதை உணர்ந்து கொண்டோம்.
பண மதிப்பு நீக்க அறிவிப்புக்கு பின், துவக்கத்தில், வர்த்தகச் சூழல் கடினமாக இருந்தது. இந்நிலையிலும், வாகன சந்தையில், நம் நிறுவனத்தின் சந்தை பங்களிப்பு உயர்ந்துள்ளது. அதிக அளவிலான புதிய வாடிக்கையாளர்கள், நம் குடும்பத்தில் இணைந்துள்ளனர்.பாதுகாப்பு, சுற்றுச்சூழல் துாய்மை மற்றும் வாடிக்கையாளருக்கு அதிக பயன்களை கிடைக்கச் செய்வது ஆகியவற்றுக்கான கொள்கைகளை அரசு வகுப்பதில் நிறுவனமும் ஆர்வம் காட்டி வருகிறது.அரசின் நிலையான கொள்கை முடிவுகளும், திட்டமிட்ட செயல்பாடுகளும் வாகன துறையின் வளர்ச்சிக்கு உதவும். அத்துடன், வாகன துறை, இலக்கு நிர்ணயித்து செயல்படவும், தொழில்நுட்பங்களை பின்பற்றுவது தொடர்பான முடிவுகளை எடுக்கவும் அவை துணை புரியும்.இவ்வாறு அவர் தெரிவித்தார்.
மின்சார கார்
மின் வாகனங்களை ஊக்குவிக்கும் இந்த அரசின் முடிவை வரவேற்கிறோம். அத்தகைய வாகனங்களை வாங்க, வாடிக்கையாளர்கள் தயாராகும் பட்சத்தில், மின் கார்களை தயாரிக்க, நிறுவனம் தயங்காது. அதற்கு முன்னோடியாக, கலப்பு எரிபொருளில் இயங்கும், ‘ஹைபிரிட்’ கார்கள் தயாரிப்பில், தொடர்ந்து நிறுவனம் கவனம் செலுத்தும். இவ்வகை கார்களுக்கும், மின் வாகனங்களுக்கும் தேவைப்படும், ‘லித்தியம் – அயன்’ பேட்டரி தொழிற்சாலையை, நிறுவனம் துவக்கி உள்ளது.– ஆர்.சி.பார்கவா தலைவர், மாருதி சுசூகி இந்தியா
மேலும் ஆட்டோமொபைல் செய்திகள்
|
Advertisement
|
Advertisement
|
Advertisement
|
|
|
|