பதிவு செய்த நாள்
12 நவ2017
23:47
‘பெரிதாக யோசியுங்கள்; ஆனால், ஒரு குறிப்பிட்ட விஷயத்தில் கவனம் செலுத்துங்கள்; உங்கள் செயல்திறன் பல மடங்கு அதிகரிக்கும்’ என, வலியுறுத்தும் வகையில், ‘தி ஒன் திங்’ புத்தகத்தை, கேரி கெல்லர் எழுதி இருக்கிறார்.
ஒரே நேரத்தில், பல விஷயங்களில் கவனம் செலுத்தாமல், ஒரு குறிப்பிட்ட விஷயத்தில் மட்டும் கவனம் செலுத்தினால், நிச்சயம் வெற்றி பெறலாம். இது தான், ரகசியம். எல்லாருக்கும், ஒரு நாளில், ஒரே அளவு நேரம் தான் இருக்கிறது. அப்படி இருக்க, ஒரு சிலர் மட்டும், எப்படி மற்றவர்களை விட, அதிக வேலைகளை செய்து முடிக்கின்றனர். அவர்களால் மட்டும், எப்படி அதிகம் சம்பாதிக்க முடிகிறது. இந்த கேள்விக்கான பதில், அவர்கள் அணுகுமுறையின் மையத்தில் இருக்கிறது. அவர்கள், எல்லாவற்றையும் சிறியதாக செய்கின்றனர். சிறியதாக செய்வது என்றால், செய்யக்கூடிய எல்லா விஷயங்களையும் விட்டு விட்டு, செய்ய வேண்டிய ஒரு விஷயத்தில் மட்டும் கவனம் செலுத்துவது.
‘எல்லா செயல்களும், ஒரே விதமாக முக்கியமானவை அல்ல’ என்பதை உணர்ந்து, செய்ய வேண்டிய சரியான செயலை கண்டறிவதாகும். உங்களுக்கு மிகவும் தேவையான விஷயத்துடன் தொடர்பு கொள்வதற்கான வழியாகும் இது.உங்கள் கவனத்தை குவிப்பதன் மூலம், எப்படி அபாரமான முடிவுகளை பெற முடியும் என, உணர்வதற்கான வழி இது. பெரும்பாலானோர், இதற்கு நேர் எதிராக செயல்படுகின்றனர். பெரிய வெற்றிக்கு, அதிக காலம் தேவை மற்றும் சிக்கலானது என, நினைக்கின்றனர். அதன் காரணமாக, அவர்களிடம், செய்ய வேண்டிய வேலைகளின் பட்டியல், பெரிதாக இருக்கிறது. ஆனால், வெற்றி சாத்தியமாகாமல், கிடைத்ததை வைத்து திருப்தி அடைகின்றனர்.
பெரிய வெற்றி, சிறிய செயல்களில் இருந்து கிடைக்கும் என்பது தெரியாமல், நிறைய விஷயங்களை முயன்று பார்த்து, குறைவாக சாதிக்கின்றனர். காலப் போக்கில், அவர்கள் தங்கள் எதிர்பார்ப்பை குறைத்து, கனவுகளையும் கைவிடுகின்றனர். அதிக விஷயங்களை செய்வதில் உள்ள சிக்கல் என்னவெனில், அது பலன் தந்தாலும் கூட, எதையும் குறைக்காமல், வேலைகளை அதிகமாக்குவது நெருக்கடிகளையும், துாக்கமின்மையையும், ஆரோக்கிய பாதிப்பையும் உண்டாக்கும். முக்கிய தருணங்களையும், குடும்பத்தினருடனான நேரத்தையும் இழக்க நேரிடும்.
சிறிய அளவில் செயல்படுவது, அசாதாரணமான பலன்களை அளிக்கக் கூடியது. ஒரு விஷயத்தில் மட்டுமே கவனம் செலுத்துவதால், அது எப்போதும் வெற்றியை தருகிறது. எனவே, உங்களுக்கான ஒரு விஷயத்தை முதலில் தேர்வு செய்து அதில் கவனம் செலுத்துங்கள்.
மேலும் வங்கி மற்றும் நிதி செய்திகள்
|
Advertisement
|
Advertisement
|
Advertisement
|
|
|
|