பதிவு செய்த நாள்
03 செப்2018
00:17
வைப்பு நிதி தரும் பலன்களை விட அதிக பலனை விரும்பும் முதலீட்டாளர்கள், ‘டெப்ட் பண்ட்’ எனப்படும் கடன்சார் நிதிகளை நாடலாம்.
பெரும்பாலான முதலீட்டாளர்கள் நிரந்தர வைப்பு நிதி முதலீட்டையே அதிகம் நாடுகின்றனர். பாதுகாப்பானது, குறைந்த ரிஸ்க் மற்றும் நிர்ணயிக்கப்பட்ட பலனை அளிப்பது இவற்றின் சாதகமான அம்சங்களாக அமைகின்றன.
எனினும், வருமான வரி மற்றும் பணவீக்கத்தின் தாக்கத்தை கருத்தில் கொண்டால், இவற்றின் பலன் குறைவாகவே இருக்கும். இந்த காரணத்தினால் பலரும், ‘டெப்ட் பண்ட்’ எனப்படும் கடன்சார் நிதிகளை நாடத்துவங்கியுள்ளனர். இவை அதிக பலன் தருவதோடு, அதிக தேர்வு வாய்ப்புகளையும் கொண்டிருக்கின்றன.
கடன்சார் நிதிகள்
மியூச்சுவல் பண்ட் திட்டங்களில் ஒன்றாக, கடன்சார் நிதிகள் அமைகின்றன. சமபங்குகளில் அதிகம் முதலீடு செய்யும் நிதிகள் சமபங்கு நிதிகள் என அறியப்படுவது போல, கடன்சார் மற்றும் நிர்ணயிக்கப்பட்ட வருமானம் தரும் பத்திரங்கள் உள்ளிட்டவற்றில் கலவையாக முதலீடு செய்யும் நிதிகள் கடன்சார் நிதிகளாக அமைகின்றன.
பல்வேறு கால அளவிலான முதிர்வு கொண்ட அரசு பத்திரங்கள், வர்த்தக நிறுவன பத்திரங்கள், மணிமார்க்கெட் பத்திரங்களிலும் இவை முதலீடு செய்கின்றன.ஆனால், இந்த நிதிகள் தரும் பலன் சந்தையின் போக்குடன் தொடர்பு கொண்டவை என்பதை மனதில் கொள்ள வேண்டும். இந்த நிதிகள் முதலீடு செய்யும் பத்திரங்கள் தரும் வட்டி வருமானம் உள்ளிட்டவற்றின் அடிப்படையில் இவை தரும் பலன் அமையும். பத்திரங்களின் மூலதன மதிப்பு உயர்வு அல்லது தேய்வு அம்சமும் பலனில் தாக்கம் செலுத்தும்.
நிதி வகைகள்
கடன்சார் நிதிகளில் பலவகை இருக்கின்றன. நிதிகளுக்கு அடிப்படையாக அமையும் பத்திரங்களுக்கு ஏற்ப வகைப்படுத்தப்படுகின்றன. சில மாதங்களுக்கு முன் பங்குச்சந்தை கட்டுப்பாட்டு அமைப்பான, ‘செபி’ வெளியிட்ட புதிய வகைப்படுத்தலின் படி, 16 வகையான கடன்சார் நிதிகள் உள்ளன.
லிக்விட் பண்ட், அல்ட்ரா ஷார்ட் டியூரேஷன் பண்ட், மணி மார்க்கெட் பண்ட், டைனமிக் பாண்ட், கார்ப்ப்ரேட் பாண்ட் பண்ட் உள்ளிட்டவை இதில் அடங்கும். இந்த நிதிகளின் கால அளவும் மாறுபடலாம். லிக்விட் பண்ட்கள் பொதுவாக, 91 நாட்களுக்கு உட்பட்ட மணிமார்க்கெட் பத்திரங்களில் முதலீடு செய்கின்றன.
இந்த நிதிகளின் பலன் அவை செய்யும் முதலீடுகளின் செயல்பாட்டிற்கு ஏற்ப அமையும். பத்திரங்கள் தரும் பலன் வட்டி விகித போக்கிற்கு ஏற்ப மாறுபடலாம். பத்திரங்களின் முதிர்வு காலம் அதிகம் இருந்தால், இந்த தாக்கமும் அதிகம் இருக்கும். குறுகிய கால நிதிகளில் இவை குறைவாக இருக்கும் என கருதப்படுகிறது.
ரிஸ்க் அம்சம்
வட்டி விகித போக்கு தவிர, முதலீடு செய்யப்பட்ட நிறுவனங்களின் பத்திரங்கள் பணத்தை திருப்பித்தர தவறும் அபாயம் உள்ளது; இதை, ‘கிரெடிட் ரிஸ்க்’ என்கின்றனர். இதை குறைக்க விரும்பினால், பாதுகாப்பு மிக்க அரசு பத்திரங்கள் உள்ளிட்டவற்றில் முதலீடு செய்யும் நிதிகளை தேர்வு செய்யலாம். அதிக ரேட்டிங் கொண்ட பத்திரங்களில் முதலீடு செய்யும் நிதிகளும் ரிஸ்க் குறைந்தவை.
வைப்பு நிதிகள் வரி விதிப்புக்கு உட்பட்டவை. கடன்சார் நிதிகளும் அவை முதலீடு செய்யப்படும் காலத்திற்கு ஏற்ப வரி விதிப்புக்கு உரியவை. எனினும், இண்டக்சேஷன் எனும், சாதக அம்சம் இதில் உள்ளது. பணவீக்கத்தை கருத்தில் கொண்ட பின் வரி விதிப்பு பொருந்துவதை இது குறிக்கிறது. வைப்பு நிதிகளில் இது கிடையாது. ஒருவர் தன் நிதி இலக்கு மற்றும் முதலீடு காலத்திற்கு ஏற்ற நிதியை தேர்வு செய்ய வேண்டும்.
மேலும் பங்கு வர்த்தகம் செய்திகள்
|
Advertisement
|
Advertisement
|
Advertisement
|
|
|
|