பதிவு செய்த நாள்

26 ஜன
2021
14:47

பொருளாதாரச் சரிவு மோசமாக இருக்குமானால், வாராக் கடன், 14.8 சதவீதத்தைத் தொடலாம். இதிலும், பொதுத் துறை வங்கிகளின் வாராக் கடன், 17.6 சதவீதமாக உயரக்கூடும்.


இந்நிலையில் தான், 'வாராக் கடன்களை வசூலிக்கும் வங்கி' என்ற பொருளில் சொல்லப்படும் 'பேடு பேங்க்' திட்டம் பேசப்படுகிறது. 1988ல், அமெரிக்காவில் இந்த வங்கி தோன்றியது. தற்போது, சுவீடன், பிரான்ஸ், பின்லாந்து, ஜெர்மனி ஆகிய நாடுகளில், இத்தகைய வங்கிகள் செயல்படுகின்றன. அங்கே உள்ளதை அப்படியே இங்கேயும் இறக்குமதி செய்ய திட்டம் தீட்டப்படுகிறது.வாராக் கடன்கள் பெரும் சுமையாக மாறி, வங்கிகளை செயல்படவிடாமல் அழுத்துகின்றன. புதிய கடன்களையோ, முயற்சிகளையோ தைரியமாக அவற்றால் எடுக்க முடியவில்லை. அதனால், வாராக் கடன்களை மட்டும் பிரித்து, இன்னொரு வங்கியிடம் ஒப்படைத்துவிட்டால், அது, கடன் வசூலைப் பார்த்துக்கொள்ளும். வசூலிக்கும் தொந்தரவு இல்லாமல், பெரிய வங்கிகள் தொடர்ந்து கடன் கொடுத்துக் கொண்டு, நாட்டின் வளர்ச்சிக்குத் துணை நிற்கலாம் என்ற கருத்து நிலவுகிறது.


வழியல்ல
உண்மையில், ரகுராம் ராஜன் சொன்னது போல், இது ஒரு கையில் இருக்கும் கடனை, இன்னொரு கைக்கு மாற்றிவிடுவதைத் தவிர வேறில்லை. பிரச்னையை ஒத்திப் போடுகிறோமே தவிர, தீர்ப்பதற்கு இது வழியல்ல.இதனால், ஏற்படக்கூடிய பல்வேறு பின்விளைவுகளைப் பற்றியும் யோசிக்க வேண்டும்.அதாவது, கடன் கொடுப்பவர்களுக்குத் தான் வசூலிக்கும் பொறுப்பும் இருக்க வேண்டும்.இரண்டும் தனித்தனியாகப் பிரியுமானால், கடன் கொடுக்கும் அதிகாரிகளுக்கு என்ன பொறுப்பு இருக்க முடியும்? 

இன்றைக்கும் பல்வேறு உள்ளூர் பெனிபிட் பண்டுகளைப் பாருங்கள். அங்கே கடன் வாங்க வருபவர்களின் மூன்று தலைமுறை ஜாதகத்தைக் கூட தெரிந்து வைத்துக்கொண்டு தான் கடனே கொடுப்பார்கள். அவர்களுடைய வாராக் கடன் விகிதம் மிகமிகக் குறைவு.வாராக் கடனுக்காக தனியாக ஒரு வங்கி என்பது பொறுப்பைத் தட்டிக் கழிப்பதற்கான முயற்சி. வங்கியின் நிதி நிலைமை எப்போதும் வலிமையாக இருப்பதாக காட்டுவதற்கான பம்மாத்து. கடனும், வசூலும் இரண்டு கண்கள். இரண்டையும் இரண்டு திசைகளில் பார்க்க வைத்தால், எதிர்காலம் கண்ணுக்கு தெரியாமல் போய்விடக்கூடும்.

-- நமது நிருபர் -